Qaskeleńde er adamdy soqqyǵa jyqqan jasóspirimder ustaldy
QONAEV. KAZINFORM — Áleýmettik jelilerde Qaskeleńde bir top jasóspirimniń er adamdy soqqyǵa jyǵyp jatqan vıdeosy tarady.
Oqıǵaǵa qatysty Almaty oblystyq polıtsııa departamenti túsinik berdi. Vedomstvonyń málimetine qaraǵanda, janjalǵa qatysqan jasóspirimniń bári ustalyp, polıtsııa bólimshesine jetkizilgen.
Polıtsııanyń habarlaýynsha, tekserý barysynda kámeletke tolmaǵandardyń mas kúıde bolǵan er adamǵa dene jaraqatyn salǵany anyqtalǵan.
Tekserý qorytyndysy boıynsha jasóspirimderdiń ata-analary balalaryn tárbıeleý jónindegi mindetterin tıisinshe oryndamaǵany úshin ákimshilik jaýapkershilikke tartyldy.
— Jınalǵan materıaldar kámeletke tolmaǵandardyń isteri jáne olardyń quqyqtaryn qorǵaý jónindegi komıssııaǵa joldandy. Komıssııa oqıǵaǵa qatysýshylarǵa qatysty aldaǵy sheshimdi qabyldaıdy, — dep habarlady polıtsııa.
Sondaı-aq zańdy ókilderiniń qatysýymen jasóspirimdermen profılaktıkalyq áńgime júrgizilip, olarǵa qoldanystaǵy zańnama talaptary túsindirilip, mundaı quqyqqa qaıshy áreketterge jol berilmeıtini eskertildi.
Al jábirlenýshi aryz jazýdan bas tartyp, janjalǵa qatysýshylarǵa qatysty eshqandaı shaǵymy joq ekenin aıtqan.
Eske salaıyq, buǵan deıin Aqtaýda teńiz jaǵalaýyndaǵy aılaqtardyń birinde birneshe er adam jappaı tóbelesip, turǵyndardyń úreıin ushyrǵanyn habarlaǵan edik.
