Qaskeleń epıskopy Gennadıı JI-dyń yqpaly jaıynda: Rýhanı myqty ustanym qajet

ASTANA. KAZINFORM – Álemdik jáne dástúrli dinder kóshbasshylary VIII Cezi aıasynda Qaskeleń epıskopy Gennadıı jasandy ıntellektiniń rýhanı qundylyqtarǵa yqpalyna qatysty pikir bildirdi. 

Qaskeleń epıskopy Gennadıı shirkeýdiń dástúrli túrde kez kelgen jańa tehnologııany adamǵa paıda da, zııan da tıgize alatyn qural retinde qaraıtynyn atap ótti. 

– Tehnologııalardy adamnyń ıgiligi úshin de, zulymdyq úshin de qoldanýǵa bolatynyn jaqsy túsinemiz. Degenmen, qazirgi ýaqytta paıda bolyp jatqan tehnologııalar adamdy jyldam baýrap alyp jatyr. Biz ata-analarymyz bilmegen aqparattyq keńistikte ómir súrýdemiz. Tipti bes jyl burynǵy qoǵamnyń ózi múlde basqa edi. Sondyqtan búginde barynsha saq bolý qajet, - dedi epıskop. 

Onyń paıymynsha, Prezıdent Qasym-Jomart Toqaevtyń jasandy ıntellekt salasyndaǵy ádep qaǵıdalaryn engizý qajettigi týraly aıtqan sózi qazirgi kún tártibindegi ózekti máseleni aıqyn kórsetip berdi.

– Zamanaýı tehnologııalar jańa qaýipterdi ákelip, adam sanasyn basqarý múmkindikterin berip otyr. Bul jaıynda kóp jazylyp, jıi aıtylyp júr. Vırtýaldy álemge tereń boılaǵan adam keıde shynaıy ómirden alystap, qarapaıym adamı qarym-qatynas daǵdylarynan aıyrylyp qalady, - dedi ol. 

Epıskop Gennadıı mundaı syn-qaterlerge qarsy turýda berik rýhanı-adamgershilik ustanymnyń kómegi zor ekenin aıtty.

– Eger adamnyń senimi berik, moraldyq jáne rýhanı tiregi myqty bolsa, onda jańa tehnologııalar oǵan teris áser ete almaıdy. Biz adamnyń ondaı ustanymdy dinnen alatynyna senimdimiz. Óıtkeni din – máńgi rýhanı qundylyqtardy alyp júretin, adamdy jaqsylyqqa jeteleıtin kúsh, - dedi ol. 

Astanada Álemdik dinder kóshbasshylarynyń sezi ótip jatyr. 

Іs-shara barysynda Qasym-Jomart Toqaev Jasandy ıntellektini damytý ádebi jónindegi dinaralyq komıssııa qurýdy usyndy.