Qaskeleń aýrýhanasynyń qyzmetkerleri Birtanovqa shaǵymdandy

ASTANA. QazAqparat - QR Densaýlyq saqtaý mınıstri Eljan Birtanovqa Qaskeleń juqpaly aýrýlar aýrýhanasynyń qyzmetkerleri shaǵymdandy, dep habarlaıdy QazAqparat tilshisi.

«Maǵan aýrýhana qyzmetkerlerinen shaǵym kelip tústi, jóndeý jumystary úshin aqsha jınap jatyr eken. Muny bildińiz be?», - dedi mınıstr Almaty oblysy densaýlyq saqtaý basqarmasynyń basshysy Baýyrjan Ysqaqqa vedomstvonyń alqa otyrysynda.

Sonymen birge, mınıstr maýsym aıynyń basynda anyqtalǵan buzýshylyqtardy 31 shildege deıin retteýdi eske saldy.

«Kelesi aptada barlyq buzýshylyqtardyń rettelgeni týraly dáleldemeler kórsetesizder. 1 tamyz kúni bizdiń komıssııa nysanǵa barady. Mundaı qysqa ýaqytta jóndeý jumystaryn jasap úlgermegen shyǵarsyzdar. Biraq taǵy da eskertemin, qajet bolsa aýrýhananyń qyzmetin toqtatýǵa deıin baramyz. Bul kemshilikterdi jóndeýge ótken jyldyń qarashasynan beri ýaqytyńyz boldy», - dedi vedomstvo basshysy.

Óz jaýabynda basqarma basshysy aýrýhananyń jóndeý jumystaryna 21 mln teńge bólingenin jáne kemshilikterdiń rettelgenin habarlady. Aqsha jınaý týraly shaǵym boıynsha, Qaskeleń juqpaly aýrýlar aýrýhanasynyń bas dárigerine qatań eskertý jarııalanǵan.

Aıta ketý kerek, Qaskeleń juqpaly aýrýlar aýrýhanasynyń múshkil jaǵdaıy týraly patsıentter áleýmettik jelide jazǵan bolatyn. Mınıstr Birtanov Almatyǵa barǵan saparynda aýrýhananyń jaǵdaıyn nashar dep baǵalap, ony Qaskeleń ortalyq aýrýhanasyna qosýdy usyndy.

Keıinirek, Almaty oblysy əkiminiń orynbasary Jaqsylyq Omar Qaskeleńniń ınfektsııalyq aýrýhanasy jabylmaıtynyn habarlady.

Óz kezeginde Birtanov atalmysh medıtsınalyq mekemeden tabylǵan kemshilikter joıylmasa, sotqa júginetinin málimdedi.