Qaskeleń aspanynda 30-ǵa jýyq áýe shary qalyqtady

Bıylǵy festıvalge Qazaqstan, Germanııa, Qyrǵyzstan, Mońǵolııa, Reseı jáne Ózbekstannan qatysýshylar jınaldy. Shara aıasynda tórt adamnan 16 adamǵa deıin tasymaldaı alatyn 29 áýe shary tanystyryldy. Olardyń arasynda úki beınesinde jasalǵan erekshe aerostat ta bar.

Almaty oblystyq týrızm basqarmasynyń basshysy Qýanyshbek Mırambekulynyń aıtýyna qaraǵanda, mundaı aýqymdy sharalarǵa daıyndyq bir jyl buryn bastalady.

– Halyqaralyq áýe sharlary festıvali Almaty oblysynda alǵash ret ótip otyrǵan joq. Onyń aldaǵy ýaqytta dástúrli sharaǵa aınalyp, otandyq qana emes, sheteldik týrısterdiń de qyzyǵýshylyǵyn arttyratyna senemin, - dedi ol.

Onyń sózinshe, 2023 jyly Qonaev qalasynda ótken áýe sharlary festıvali kezinde qonaqúıler, meıramhanalar, kottedjder, demalys oryndary men hostelder tolyqtaı brondalǵan.

– Mundaı jobalar ýaqytsha bolsa da, jańa jumys oryndarynyń ashylýyna yqpal etedi. Festıvaldi uıymdastyrýshylar, tehnıkalyq mamandar, ártister jáne basqa da sala ókilderi jumysqa tartylady. Sondyqtan mundaı sharalar týrızmdi ǵana emes, tutas óńir ekonomıkasyn da damytýǵa serpin beredi, - dedi ol.

Festıvalge shetelden kelgen qatysýshylardyń biri – mońǵolııalyq ushqysh Batyr (Ganbaatar) Davaatseren. Ol buryn polıtsııada qyzmet etken, keıin áýe sharlaryna qyzyǵyp, aerostat basqarýdy meńgergen. Qazir ol Mońǵolııadaǵy alǵashqy ári ázirshe jalǵyz jylý aerostatynyń ushqyshy sanalady. Onyń 6 jyl ishinde aspanda ushý tájirıbesi 290 saǵatqa jýyqtaǵan.

Al Taraz turǵyny Almaz Adambaı áýe sharlaryna medıtsına salasynan kelgen. Mamandyǵy boıynsha feldsher bolǵan ol aerostat basqarýdy Qaraǵandyda oqyp úırengen. Qazir onyń bul saladaǵy tájirıbesi úsh jylǵa jetip, halyqaralyq deńgeıdegi festıvalderge de qatysyp úlgergen. Sonyń ishinde Ózbekstanda ótken halyqaralyq áýe sharlary festıvali de bar.

Qazaqstannyń Áýe sharlary federatsııasy vıtse-prezıdenti Raqym Qazybaev elimizde aerostat ushqyshy ataný úshin qandaı talaptar qoıylatynyn aıtyp berdi. Onyń ózi 7 jyl ishinde 150 saǵattan astam ushý tájirıbesin jınaqtaǵan.

Onyń sózinshe, áýe sharyn basqarýdy úırenýge kez kelgen adamnyń múmkindigi bar. Alaıda úmitkerdiń densaýlyǵy jaqsy bolyp, arnaıy oqýdan ótýge qabiletti bolýǵa tıis. Úmitkerler medıtsınalyq tekserýden, psıhologııalyq synaqtan ótip, arnaıy daıyndyq jasaıdy. Al kommertsııalyq reısterge qatysý úshin keminde 50 saǵat óz betinshe ushýy qajet.

– Barlyq talaptyń mańyzy zor. Ushqyshtar jyl saıyn dárigerlik-saraptamalyq komıssııadan ótedi. Onyń quramynda psıhologtan bastap kardıologqa deıingi túrli maman bar. Talaptar ekinshi sanattaǵy ushaq ushqyshtaryna qoıylatyn standarttarǵa óte jaqyn. Tek ushýǵa ruqsat alǵannan keıin oqýdy bastaýǵa bolady, - dedi Qazybaev.

Qazaqstanda áýe sharlarymen ushý qyzmeti Almaty, Óskemen, Qaraǵandy jáne Astana qalalarynda qoljetimdi. Aqyly ushýlar jyl boıy ótkiziledi. Jazda olar kóbine tańerteń nemese keshki ýaqytta ótkizilse, qys kezinde qolaıly aýa raıynda kúndiz de ushýǵa bolady. Al ekpini kúshti jel, joǵary aýa temperatýrasy men jaýyn-shashyn áýe sharlarynyń kóterilýine kedergi bolady.

Áýe sharlaryn tehnıkalyq tekserisi men sertıfıkattaý jumystary Qazaqstanda júrgiziledi.

Festıval uıymdastyrýshysy Natalıa Rastoropnova bıylǵy jańa alańnyń ushqyshtardyń usynysymen tańdalǵanyn aıtty. Áýe sharlarynan bólek, qonaqtarǵa alyp áýe batpyraýyqtarynyń shoýy, fýdkorttar, kempıngter jáne búkil otbasyǵa arnalǵan túrli oıyn-saýyq baǵdarlamasy usynylǵan. Balalar úshin sheberlik sabaqtary, batýttar men anımatorlar jumys isteıtin arnaıy aımaq qarastyrylǵan.

Sondaı-aq kelýshilerge erekshe múmkindik berildi – áýe sharymen ushý kezinde súıiktisine úılený týraly usynys jasaýǵa bolady.

Festıvaldi uıymdastyrý men ótkizýge 700-den astam adam tartylǵan. Olardyń qatarynda ushqyshtar, tehnıkalyq mamandar, eriktiler, quqyq qorǵaý organdarynyń qyzmetkerleri men qaýipsizdik mamandary bar.

Sharaǵa Qyrǵyzstan, Ózbekstan jáne basqa da elderden týrıster kelgen.

Aıta keteıik, alǵashqy áýe sharlary festıvali 2017 jyly ótip, oǵan 20 myńnan astam adam qatysqan.

Ekinshi festıval 2023 jyly Qonaev qalasynda uıymdastyrylyp, eki kún ishinde 60 myńnan astam qonaqty qabyldaǵan.

Al 2024 jyly Qazaqstandaǵy sý tasqynyna baılanysty festıval ótkizilmedi.