Kásiptik-tehnıkalyq oqý oryndarynyń bilim berý deńgeıi mektepten de tómen bolyp tur - mınıstr B. Jumaǵulov
ASTANA. 23 tamyz. QazAqparat - Búginde kásiptik-tehnıkalyq oqý oryndarynyń bilim berý deńgeıi mektepten de tómen bolyp tur. Bul týraly búgin Tamyz konferentsııasynyń plenarlyq májilisinde QR Bilim jáne ǵylym mınıstri Baqytjan Jumaǵulov málim etti.
Onyń aıtýynsha, bıyl joǵary oqýǵa túsetin tehnıkalyq jáne kásiptik bilim berý mekemeleriniń túlekteri úshin keshendi testileý eki ret uıymdastyryldy. «Onyń nátıjeleri máz emes. Oǵan qatysqan ótken jylǵy mektep túlekteriniń 60 paıyzy shekti deńgeıden ótse, kolledj bitirýshileriniń tek 30 paıyzy ǵana qajetti upaı sanyn jınap aldy. Bul degenimiz, mekteppen salystyrǵanda, kásiptik-tehnıkalyq oqý oryndarynda orta bilim nashar beriledi», - deıdi B. Jumaǵulov. Osyǵan oraı, mınıstr baqylaý komıtetine tıisti sharalardy qolǵa alýdy tapsyrdy.
