Kásiptik-tehnıkalyq lıtseılerde oqý baǵdarlamalary jańarǵanymen, materıaldyq baza áli eski kúıinde
ASTANA. 16 mamyr. QazAqparat - Kásiptik-tehnıkalyq lıtseılerde oqý baǵdarlamalary jańarǵanymen, materıaldyq baza áli eski kúıinde tur.
Búgin Májilistiń jalpy otyrysynda Bilim jáne ǵylym mınıstriniń atyna saýal joldaǵan depýtat Almas Turtaev osylaı málim etti.
Depýtat saýal barysynda ishki eńbek naryǵynyń qajettiligine jáne halyqaralyq talaptarǵa jaýap beretin kásibı mamandardy daıarlaý Bilim jáne ǵylym mınıstrliginiń negizgi mindetiniń biri ekenin eske sala kele, «ókinishke qaraı qazirgi tańda kásiptik bilimi bar bilikti orta býyn kadrlar jetispeýshiligi anyq sezilip otyrǵanyn» atap ótti. Onyń aıtýynsha, tehnıkalyq jáne kásiptik bilimi bar mamandar men zaman talaptaryna jaýap beretin jańa mamandyqtar boıynsha orta býyn kadrlaryn daıarlaý is júzinde naqty damýǵa ıe bolmaı otyr. Buǵan de negiz bar sekildi.
«Óıtkeni, oqý baǵdarlamalary men memlekettik jalpyǵa mindetti bilim beretin standarttardyń jańarýyna qaramastan oqý úderisinde negizinen moraldyq jaǵynan eskirgen tehnıka, jabdyqtar men quraldar qoldanylyp keledi. Aýdandarda ornalasqan kásiptik-tehnıkalyq lıtseılerdiń materıaldyq-tehnıkalyq bazasynyń jaı-kúıi qazirgi bilim berý tehnologııalarynyń talaptarynan tym alysta jatyr. Aýyl sharýashylyǵy mamandyqtary boıynsha bilim berý qyzmetin júrgizetin kolledjder men kásiptik lıtseılerde áli kúnge deıin ótken ǵasyrdyń 70-90 jyldary shyǵarylǵan, tozyǵy jetken tehnıkalar qoldanylady. Mundaı jaǵdaı bilikti jumysshy kadrlar men mamandar daıarlaý problemasyn tolyqqandy sheshýge múmkindik berer emes», - deıdi A. Turtaev.
Budan bólek, depýtattyń aıtýynsha, ekonomıkanyń túrli salalaryndaǵy kadrlar suranysyna taldaý jasalmaý saldarynan bitirýshilerdiń eńbekke ornalasý deńgeıi de jyl saıyn tómendep keledi. ıAǵnı, kásiptik bilim berý uıymdarynyń oblystardaǵy orta jáne shaǵyn bıznesti qoldaý, damytý ortalyqtarymen, jumys berýshiler qaýymdastyqtarymen baılanysy óz deńgeıinde emes.
«Úlken qarjylyq kapıtaldy qajet etetin ǵylymǵa negizdelgen óndirister osylaısha kadrlyq tapshylyqty sezinip, bilikti býyn mamanyna zárý bolyp otyr. Endeshe, bul mınıstrliktiń memlekettik kásibı bilim berýdi josparlaý kezindegi eńbek naryǵyna marketıngtik zertteýlerdi durys júrgizgenine kúmán keltirtedi», - deıdi A. Turtaev.
