Kásiptik-tehnıkalyq bilim berý júıesine kadrlardy daıyndaýdyń dýaldy júıesi engiziledi - B.Jumaǵulov
ASTANA. 29 naýryz. QazAqparat - Bilim jáne ǵylym mınıstrligi kásiptik-tehnıkalyq bilim berý júıesine kadrlardy daıyndaýdyń dýaldy júıesin engizýdi josparlaýda, dep málim etti atalǵan vedomstvonyń basshysy Baqytjan Jumaǵulov Pavlodar oblysyna jasaǵan jumys saparynyń barysynda.
Bul aqparatty pm.kz saıty taratyp otyr.
Elbasy N.Nazarbaev «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýynda jumys isteıtin jastarǵa óndiristen qol úzbeı kásiptik bilim alý múmkindigin jasaý týraly usynys engizdi.
«Jumys isteıtin jastar úshin jumystan qol úzbeı arnaýly bilim alý múmkindigin qamtamasyz etý - mańyzdy másele. Árbir jastyń jumystan qol úzbesten mamandyq pen bilim alý múmkindigi bolýy kerek. Bilim jáne ǵylym mınıstrligi bul máseleni oılastyrýy tıis», - dedi Elbasy óz Joldaýynda.
Osyǵan oraı, Bilim jáne ǵylym mınıstrligi shet elderdiń tájirıbelerin zerttep, sátti degen tájirıbelerdi tehnıkalyq jáne kásiptik bilim berý júıesine engizýdi josparlaýda.
«Jaqynda GFR-ǵa jasaǵan sapar barysynda biz TjKB júıesindegi mamandar daıarlaýdyń dýaldy júıesimen tanystyq. Osy júıemen qamtylǵandar ýaqyttarynyń 4/3 bóligin óndiriste ótkizedi, sonda eńbek etip, sonda sheberlikterin shyńdaıdy, al qalǵan ýaqyttaryn teorııalyq bilim alýǵa jumsaıdy», - dedi B.Jumaǵulov.
Mınıstrdiń aıtýynsha, dýaldy júıeniń basymdyǵy sol - oqytýdyń óndirispen tyǵyz baılanysy. Qazir elimizde osynaý júıeni qoldaný múmkindigi zerdelenýde.
2011 jyly respýblıka boıynsha TjKB júıesine kiretin bilim oshaqtarynyń jalpy sany 896 birlikti quraǵan, bul aldyńǵy jylǵy kórsetkishten 14 oqý mekemesine artyq. Kásiptik-tehnıkalyq bilim berý mekemelerinde qazirgi tańda 600 myńnan astam qazaqstandyq bilim alyp jatyr.
