Kásiptik bilim berý eńbek naryǵynan esh alshaqtamaýy kerek - T. Dúısenova
ASTANA. QazAqparat - Kásiptik jáne tehnıkalyq bilim berý eńbek naryǵynan esh alshaqtamaýy kerek. Búgin Senatta orta tehnıkalyq jáne kásiptik bilim berý júıesiniń bolashaǵyna arnalǵan ǵylymı-tájirıbelik konferentsııa barysynda Densaýlyq saqtaý jáne áleýmettik damý mınıstri Tamara Dúısenova osylaı aıtty.
Mınıstrdiń sózine qaraǵanda, HHІ ǵasyrda memlekettiń ekonomıkalyq keleshegin aıǵaqtaıtyn birden bir faktor - onyń kadrlyq áleýeti. Sondyqtan da, adamı kapıtaldy damytýǵa baǵyttalǵan bilim berý júıesin qalyptastyrýdyń mańyzy zor bolyp otyr.
«Damyǵan elderde tehnıkalyq jáne kásiptik bilim berý júıesi - bul ındýstrııalyq damýdyń jáne onyń básekege qabilettiliginiń negizi. Máselen, óńdeýshi ónerkásip ónimderin eksporttaýda álemdik kóshbasshy bolyp sanalatyn Germanııada jumyspen qamtylǵandardyń 60 paıyzdan astamynda kásiptik-tehnıkalyq bilim bar. Sıngapýrda mektep oqýshylarynyń 90 paıyzdan astamy kásiptik-tehnıkalyq bilim berý júıesinen ótedi. Sonymen qatar, álemniń eshbir eli kásibı kadrlardy daıarlaý júıesin jetildirmeı turyp, ındýstrııalyq damý men básekege qabilettilikti arttyra almaǵanyn este saqtaýymyz kerek», - dedi mınıstr T. Dúısenova.
Onyń aıtýynsha, bizdiń elimizdiń eńbek naryǵy qurylymynda birqatar problemalar qordalanǵan. Bular: jumys kúshiniń tapshylyǵy; jumyssyzdyq; óńilerde, biliktilikter men qyzmetter túri boıynsha jumys kúshine suranys parametrleriniń usynysqa sapalyq sáıkes kelmeýi. Mınıstrdiń paıymynsha, bundaı faktiler qurylymdyq jumyssyzdarǵa da ákep soqtyrýda.
«Mundaı jaǵdaıda kásibı bilim berý eńbek naryǵynan esh alshaqtamaýy kerek. Jumys berýshiler bilim júıesimen birlese qandaı mamandyqqa qalaı oqytý kerektigi týraly áreket etýleri shart. Bizde bul máselege uzaq ýaqyt boıy kóńil bólinbeı keldi. Júrgizilgen reformalar belgili bir shekten aspady. Eń aqyry búgingi kúni ónerkásiptik óndirister kadr daıarlaýǵa keńinen aralaspaı otyrǵanyn moıyndaýymyz kerek», - dedi T. Dúısenova.
