Kásiporyndardyń ishki baqylaý júıesinde eńbekti qorǵaý jónindegi birlesken komıssııa qurý usynylady - G. Ábdiqalyqova
ASTANA. 6 qańtar. QazAqparat /Qanat Mámetqazyuly/ - Búgin QR Senaty Áleýmettik-mádenı damý komıtetiniń keńeıtilgen otyrysynda depýtattar «QR Eńbek kodeksine ózgerister men tolyqtyrýlar engizý týraly» zań jobasyn talqylady.
Zań jobasymen tanystyrǵan Eńbek jáne halyqty áleýmettik qorǵaý mınıstri Gúlshara Ábdiqalyqovanyń aıtýynsha, qujat elimizdegi eńbek zańnamasyn odan ári jetildirýge baǵyttalady. Aıta keterligi qoldanystaǵy Eńbek kodeksiniń qabyldanǵanyna 4 jyl merzim ótken bolatyn, sondyqtan da salalyq zańnamanyń birqatar erejeleri zamanǵa saı ózgeristerdi qajet etedi. Mınıstrdiń sózine qaraǵanda, zań jobasymen usynylǵan ózgerister negizinen Qazaqstannyń 2020 jylǵa deıingi quqyqtyq saıasat tujyrymdamasymen sáıkestendirý maqsatynda ázirlengen. Toqtala ketetin jaıt, tujyrymdama boıynsha eńbek zańnamasyna halyqaralyq talaptardy engizý qarastyrylǵan edi.
«Zań jobasy arqyly jumysshylardyń eńbek quqyqtarynyń buzylýyn eskertetin normalar qatańdatylady, olardyń qoldanysy barysyndaǵy qarama qaıshy normalar joıylady. Budan bólek, eńbek qatynastaryna qatysýshylardyń quqyqtary men mindetterin júzege asyrý barysyndaǵy sybaılas jemqorlyqty týdyratyn faktorlar retinde basy artyq ákimshilik kedergilerdi alyp tastaý kózdeledi. Áleýmettik áriptestik salasynda taraptardyń múddelerin qorǵaý, ujymdyq qatynastardy qamtamasyz etý boıynsha qoldanystaǵy formalar men tásilderdi jaqsartý kózdeledi», - deıdi mınıstr G. Ábdiqalyqova.
Sonymen qatar, zań jobasynda Halyqaralyq eńbek uıymynyń talaptaryn eskere otyryp, eńbek qaýipsizdigi salasynda kásiporyndardyń ishki baqylaý júıesinde eńbekti qorǵaý jónindegi birlesken komıssııa qurý usynylady. Onyń quramyna basym negizde jumysshylar men jumys berýshilerdiń ókilderiniń kirýi zań normalarymen qarastyrylady.
