Kásiporyndardy bankrot dep tanyǵannan keıin bıznesti saqtap qalýdyń jańa joldary qamtylady
ASTANA. QazAqparat - Búgin Senattyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ońaltý jáne bankrottyq máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Qujatta Elbasynyń «100 naqty qadam» Ult jospary sheńberindegi bıznestiń tólemge qabiletsizdigin sheshýdiń tıimdi júıesin qurýǵa erekshe mán beriledi.
Qarjy mınıstri Baqyt Sultanovtyń aıtýynsha, zań jobasymen kásiporyndardy bankrot dep tanyǵannan keıin bıznesti saqtap qalýdyń jańa joldary, sonymen birge, ońaltý jáne bankrottyq rásimderin ótkizý merzimin qysqartý sharalary usynylady.
«Zań jobasyndaǵy jańalyqtarǵa sáıkes, tólem qabiletsizdik belgileri paıda bolǵan jaǵdaıda boryshker ózin bankrot dep tanymaı, tólem qabiletsizdigin retteý rásimin qoldanýǵa quqyly bolmaq. Bundaı rásimdi qoldanǵan sátten bastap, barlyq bereshek túrleri boıynsha turaqsyzdyq aıybyn esepteý toqtatylady jáne kredıtorlarǵa boryshkerdi bankrot dep taný týraly sotqa ótinish berýge tyıym salynady. Budan bólek, boryshkerge barlyq kredıtorlarmen bereshekti óteý tártibi boıynsha kelisim jasasýǵa eki aı beriledi, bundaı kelisim sotpen bekitiledi», - deıdi mınıstr. Onyń aıtýyna qaraǵanda, eger bereshekti óteý tártibi boıynsha kredıtorlarmen kelisimge kelmese nemese sot kelisimdi bekitýden bas tartsa, boryshker bir jyl ishinde rásimdi qaıta qoldana almaıdy, al kredıtorlar úshin boryshkerdi bankrot dep taný týraly sotqa júginýge quqyq týyndaıdy.
Zań jobasyndaǵy ózgeristerdiń bir parasy bankrot dep tanylǵan boryshkerdiń bıznesin saqtap qalýdyń balamaly tetikterin qurýdy qarastyrady. «Bul rette birinshiden, bankrottyq rásiminen ońaltýǵa kóshý kózdelip otyr. Ekinshiden, bankrottyqtyń kez kelgen satysynda bitimgershilik kelisim jasasý quqyǵy beriledi. Bitimgershilik kelisim barlyq kredıtorlar kelisken jaǵdaıda jasalady. Mehanızmniń mindetti sharty bitimgershilik kelisim jasalǵanǵa deıin eńbekaqy boıynsha bereshekti tolyq kólemde óteý bolyp tabylady. Úshinshiden, bankrot-kompanııany satý jáne menshik ıesin aýystyrý. Bul rette bankrottyq rásimindegi bıznes sýbektisin saqtap qalý maqsatynda, kásiporyndy tutas, qaryzdarymen qosa satý usynylady. Tutastaı alǵanda, joǵaryda atalǵan ózgeristerdi júzege asyrý, rásimderdiń tetikterin ońaılatý jáne merzimderin qysqartý arqyly ekonomıkadaǵy tólem qabiletsizdiginiń problemalaryn der kezinde sheshýge oń áserin tıgizedi. Bunyń nátıjesinde, bıznesti, jumys oryndary men salyq salý bazasyn barynsha saqtap qalýǵa múmkindik beriledi»,- dedi mınıstr Baqyt Sultanov.
