Kásiporyndarda eńbekti qorǵaýdy basqarý júıesin engizý usynyldy
«Kelissózder júrgizý jáne ujymdyq sharttarǵa qol qoıý barysynda barlyq jumyskerlerdiń pikirin eskerý úshin kásipodaq músheleri bolyp sanalmaıtyn qyzmetkerlerdiń múddelerin bildirý boıynsha saılanbaly ókilderdiń ókilettikterin bekitý josparlanýda. Sondaı-aq ujymdyq shart qatynastarynyń damýyn kúsheıtý maqsatynda bir uıymda bir ujymdyq shart qana jasalýy týraly talap usynylady», - dedi mınıstr.
Budan bólek, jeke eńbek daýyn retteýdiń sotqa deıingi tártibin naqtylaý úshin jumys berýshige kelisim komıssııalaryn qurýdy mindetteý usynylady.
Munymen qosa, B. Nurymbetov áleýmettik áriptestikti retteý salasyna qatysty ózgeristerge toqtaldy. Kásipodaqtar qyzmetine baılanysty Halyqaralyq eńbek uıymynyń usynymdaryn oryndaý maqsatynda atalǵan zań jobasy aıasynda Eńbek kodeksine jáne «Kásipodaq týraly» Zańyna ózgerister men tolyqtyrýlar engizý kózdelgen.
«Eńbek qaýipsizdigi men ony qorǵaý salasyndaǵy Qazaqstan zańnamasyn odan ári jetildirý maqsatynda kásiporyndarda eńbekti qorǵaýdy basqarý júıesin engizý usynylady. Eńbekti qorǵaýdy basqarý júıesi jumys ornyndaǵy kásiptik táýekelderdi baǵalaýǵa negizdeletin bolady. Jumys berýshiniń eńbek qaýipsizdigin basqar júıesin engizý jáne onyń qyzmet atqarýyna baqylaý júrgizý boıynsha mindetteri, sondaı-aq eńbek salasyndaǵy ýákiletti organnyń osyǵan baılanysty úlgilik erejesin, jumyskerler sanynyń salaaralyq úlgilik normatıvterin ázirleý men bekitý boıynsha mindetteri kózdeledi», - dedi vedomstvo basshysy.
Atap aıtqanda, eńbek qaýipsizdigi men eńbekti qorǵaýda ishki baqylaýdy kúsheıtý maqsatynda kásiporyndarda eńbek qaýipsizdigi jáne eńbekti qorǵaý jónindegi óndiristik keńes qurý merzimin zańdy túrde belgileý josparlanýda.
Budan buryn habarlanǵandaı, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine eńbek máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasynda jumyskerdiń laıyqty eńbek jáne turmys jaǵdaılaryna quqyǵyn belgileý jáne ákimshilik zańnamaǵa teń eńbek jaǵdaılary boıynsha kemsitý faktilerine jol bergeni úshin jumys berýshilerdi jaýapkershilikke tartýǵa negizdeme engizýge usynylady.
Qujat eńbek qatynastaryn, áleýmettik seriktestikti, qaýipsizdik jáne eńbekti qorǵaý máselelerin retteýge baǵyttalǵan.
Sondaı-aq zań jobasynda kompanııalardyń bir toby sheńberinde, ıaǵnı bir quryltaıshylary, qatysýshylary nemese aktsıonerleri bar zańdy tulǵalar arasynda qyzmetkerlerdi issaparǵa jiberý múmkindikterin keńeıtý qarastyrylǵan.