Kásiporyndar jumys rejımin qysqartýǵa quqyly - mınıstr

NUR-SULTAN. QazAqparat – Qazaqstandaǵy jumys berýshiler qysqartylǵan jumys rejımine ózderiniń jeke buıryǵymen kóshýge quqyly. Bul týraly QR Eńbek jáne halyqty áleýmettik qorǵaý mınıstri Birjan Nurymbetov Ortalyq kommýnıkatsııalar qyzmetindegi brıfıngte aıtty, dep habarlaıdy QazAqparat tilshisi.

«Eger de jumys kólemi shekteletin bolsa, jumys berýshiler ózderiniń buıryǵymen qysqartylǵan jumys rejımine kóshýge quqyly. Munda aptadaǵy jumys kúnderiniń sany nemese bir kúndegi atqarylatyn jumys saǵaty azaıýy múmkin. Nemese jumys kúnimen birge, saǵat ta azaıýy yqtımal.

Bul jaǵdaıda jumys istep júrgen azamattar saǵatyna qaraı eńbekaqy alatyn bolady.

ıAǵnı, mysaly aptasyna jumys kúni bes kúnnen úsh kúnge qysqartylsa, aptasyna úsh kúndik jalaqyny alady. Nemese bir kúnde segiz saǵattyń ornyna tórt saǵat jumys atqarylsa, tórt saǵattyń jalaqysy mindetti túrde tólenetin bolady. Tolyq emes jumys kúni Eńbek kodeksiniń 70-babymen retteledi», - dedi B. Nurymbetov.

Buǵan deıin mınıstr qashyqtyqtan jumys isteý múmkindigi bar barlyq kásiporyndar men mekemeler osy rejımge aýysýǵa mindetti ekenin málimdegen edi. Sondaı-aq eńbekaqy qalaı tólenetinin aıtty.

Eske sala ketsek, Dúnıejúzilik densaýlyq saqtaý uıymy koronavırýsty pandemııa dep jarııalaýyna baılanysty azamattardyń ómiri men densaýlyǵyn qorǵaý maqsatynda QR Prezıdentiniń Jarlyǵymen Qazaqstan Respýblıkasynyń barlyq aýmaǵynda 2020 jylǵy 16 naýryzdan 2020 jylǵy 15 sáýirge deıin tótenshe jaǵdaı engizildi.

Sondaı-aq Qazaqstan azamattaryna 15 sáýirge deıin el aýmaǵynan shyǵýǵa tyıym salyndy.

QR Prezıdenti Qasym-Jomart Toqaev el halqyna úndeý joldady. Joldaýdyń tolyq mátini arnaıy jarııalandy.