Kásiporyndar TjKB júıesiniń stýdentterine arnap 132 myńdaı jumys ornyn bólip otyr
ASTANA. 23 qyrkúıek. QazAqparat - Tehnıkalyq-kásiptik bilimdi basqarýdyń jańa júıesin engizý jobasynyń aıasynda elimizdiń kásiporyndary tájirıbeden ótetin tehnıkalyq jáne kásiptik bilim berý júıesiniń stýdentterine arnap 132 myńǵa jýyq jumys ornyn usynyp otyr,
dep habarlady pm.kz saıty QR Bilim jáne ǵylym mınıstrliginiń baspasóz qyzmetine silteme jasap.
«Kásiptik-tehnıkalyq bilimdi basqarýdyń engizilgen jańa júıesiniń aıasynda jáne salalyq jáne óńirlik keńester júrgizgen jumystyń arqasynda kásiporyndar men oqý oryndary ózara 17,5 myń kelisimshartqa qol qoıdy jáne tájirıbe ótetin stýdentterge 132 myń jumys orny bólindi», - delingen vedomstvo habarlamasynda.
Aıta ketý kerek, elimizde jumys berýshilerdiń, sondaı-aq Ulttyq keńestiń belsendi atsalysýymen 16 óńirlik jáne 14 salalyq keńes quryldy.
Bilim jáne ǵylym mınıstrliginiń aqparaty boıynsha, jumys berýshiler TjKB júıesiniń stýdentterine arnap 3 myńnan astam shákirtaqy taǵaıyndady, 1266 oqytýshy óndiriste taǵlymdamadan ótti.
Jumys berýshiler oqý baǵdarlamalaryn jasaýǵa, oqý tájirıbesin uıymdastyrýǵa, túlekterdi daıyndaý jáne olarǵa berilgen biliktiliktiń sapasyn baǵalaýǵa belsendi atsalysýda.
Oǵan qosa, TjKB júıesine úzdik álemdik tájirıbelerdi taratý úshin oqý oryndarynyń 140 oqytýshy men basshylary Sıngapýrde biliktilikterin jetildirip qaıtty.
