Kásiporyndar men seriktestikterdiń jarǵylyq qorlarynyń shegin normatıvti qujattarda kórsetý qajet - Joǵarǵy sot tóraǵasy M.Álimbekov
ASTANA. Qarashanyń 18-i. QazAqparat /Aıdar Ospanalıev/ - 1990 jyldary sotta talqylanatyn máseleler negizinen qylmystyq ister men kásiporyndardyń bankrotqa ushyraýyna baılanysty bolsa,
qazir olar kóbine jyljymaıtyn múlikke ıelik etýge, túrli kelisimder men sharttardyń jáne memlekettik organdardyń sheshimderine shaǵymdanýmen baılanysty bolyp otyr. Basqasha aıtqanda sottaǵy daýlardyń nysandary túbegeıli ózgerdi. Óz kezeginde ol ulttyq zańnamalar men quqyq qorǵaý júıesin tolyqtaı jetildire túsýdi qajet etip otyr. Bul týraly búgin Astanada ótip jatqan Qazaqstan Respýblıkasy sýdıalarynyń V sezinde Joǵarǵy sot tóraǵasy Musabek Álimbekov málim etti, dep habarlaıdy QazAqparat.
Onyń aıtýynsha, atalmysh máseleler eldiń 2010-2020 jyldarǵa arnalǵan Quqyqtyq saıasat tujyrymdamasynda jaqsy kórinis tapqan. Onyń aıasynda memleket quqyqtyq qatynastardy jan-jaqty ári naqty retteıtindeı múmkindikke qol jetkizýi qajet. «Búginde sot júıesinde oryn alyp otyrǵan kemshilikter men problemalar elimizdiń zańdary tarapynan durys rettelmeýine baılanysty bolyp otyr», dedi Joǵarǵy sot tóraǵasy.
Onyń sózine qaraǵanda, sottarda jeke menshikti qorǵaý men korporatıvti daýlarǵa, reıderlikke jáne jalǵan kásipkerlikke qatysty ister shyn máninde kóbeıýde. «Sot tájirıbesin negizge alatyn bolsaq, búginde eldegi sharýashalyq sýbektilerin qurýǵa qatysty qoıylatyn sharttar jeńil. Nátıjesinde el azamattary aldymen quny mıllıondarǵa ulasatyn kelisimsharttar jasap alyp, artynan tek vırtýaldy túrde ǵana jumys isteıtin sýbektiler boıynsha sotqa shaǵymdanýǵa májbúr. «Sondyqtan qandaı da bir kásiporyn nemese seriktestik qurýǵa qajetti jarǵylyq qordyń deńgeıi normatıvti-quqyqtyq aktilerde kórsetilgeni abzal. Bul shara óz kezeginde kelisim jasaýshy taraptardyń bir-biriniń múmkindikteri jóninde jaqsy bilýlerine múmkindik beredi. Sonda olar tarapynan sotqa joldanatyn ister sany aıtarlyqtaı azaıady», dedi M.Álimbekov.
