Kásiporyndar qaldyq kózderine qatysty monıtorıng júıesin ornatýǵa mindetteldi

NUR-SULTAN. QazAqparat – Otandyq kásiporyndar 2023 jylǵa deıin shyǵarylatyn qaldyqtarǵa qatysty avtomattandyrylǵan onlaın monıtorıng júıesin ornatýy tıis. Bul týraly QR Ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Zulfuhar Joldasov málim etti, dep habarlaıdy QazAqparat tilshisi.

«2023 jylǵa deıin barlyq iri kásiporyndar shyǵarylatyn qaldyq kózderine qatysty avtomattandyrylǵan onlaın monıtorıng júıesin ornatýy tıis jáne ol týraly komıtetke derekter berip otyrýy kerek», - dedi Z. Joldasov OKQ-de ótken baspasóz máslıhatynda.

Onyń aıtýynsha, avtomattandyrylǵan monıtorıng júıesin engizý kásiporyndar shyǵaratyn zııandy qaldyqtar kórsetkishin onlaın rejimde qadaǵalaý men qandaıda bir zań buzýshylyqty ýaqytyly anyqtaýǵa múmkindik beredi.

«Sonymen qatar, atalǵan júıe halyqtyń ónerkásip jumysyna degen senimin artyp, jurtshylyqty ashyq aqparatpen qamtamasyz etý úshin mańyzdy», - deıdi ol.

Aıta ketsek, buǵan deıin komıtet basshysy elimizde ekologııalyq problemalardy sheshýdiń jol kartasy ázirlengenin aıtty.

Atalǵan joba 17 baǵyttan turady. Jáne ol 2025 jylǵa qaraı elimizdegi 10 qala atmosferasynyń lastaný ındeksin joǵary deńgeıden ortasha deńgeıge deıin tómendetýge múmkindik beredi.

Odan bólek, Ekologııalyq retteý jáne baqylaý komıtetiniń tóraǵasy Zulfuhar Joldasov elimiz boıynsha aýasy las 10 qalany atap berdi.

Atmosferanyń lastanýyna qalalardaǵy jylý qazandyqtary, avtokólik pen jeke sektorlar sebep bolyp otyr.