Kásiporyndar 600-den asa jumys orny bos turǵanyn jasyryp, eńbekkerlerge artyq jumys istetken
Eńbek janjaldarynyń kúsheıýine baılanysty Mańǵystaý oblysynyń prokýratýrasy oblystaǵy birqatar kásiporyndardyń qyzmetine tekserý júrgizgen.
6 kásiporynda órtke qarsy, ónerkásiptik, sanıtarlyq-epıdemıologııalyq qaýipsizdik jáne basqa da zańnamalar boıynsha 587-den astam kemshilik anyqtalǵan.
Tekseris barysynda 412 qyzmetkerge 34,4 mln tenge ótemaqy tólendi.
Birqatar jumys berýshiler ákimshilik jaýapkershilikke tartyldy.
Máselen, bir kásiporynnyń 137 qyzmetkeri ystyq tamaqpen qamtamasyz etilmese, 5 kásiporynda 637 bos jumys ornynyń baryn jasyrǵan, 63 qyzmetkerdiń jumys ýaqyty asyra oryndalǵan.
Prokýror aktileri boıynsha 541 qyzmetkerge ústeme jumys istegeni úshin alǵash ret 63 mln teńge kóleminde ústemeaqy berildi.
Sondaı-aq prokýrorlar aımaqtaǵy kásiporyndardyń birindegi jumysshylardyń 51 balasyn Şýchınsk qalasyndaǵy «Baldáýren» lagerine (alǵash ret jumys berýshiniń esebinen) jiberýge yqpal etti.
Jalpy, tekserý nátıjesi boıynsha 39 qadaǵalaý aktisi engizilip, azamattardyń quqyǵyna áser etetin basqa da faktorlarǵa taldaý júrgizilip jatyr.
2022 jylǵy 20 qazanda oblys prokýrorynyń tóraǵalyǵymen oblys ákimi men basqa da memlekettik organdar men iri munaı-gaz kompanııalary basshylarynyń qatysýymen ótken keńeıtilgen alqa májilisinde osy jáne ózge de faktiler talqylandy.
– Anyqtalǵan zańbuzýshylyqtar kásiporyn basshylarynyń jumysshylardyń quqyqtaryn barynsha saqtaý qajettigin múlde durys túsinbegenin kórsetedi, – dep atap ótti oblys prokýrory Rýfat Quttyqov. – Biz aldaǵy ýaqytta da jumysshylardyń quqyqtaryn múltiksiz saqtaýdy talap etip, kásiporyn basshylarynyń mindettemelerdi oryndaýyn qadaǵalaıtyn bolamyz.
