Kásiporyn óz aldyna, oqý orny óz aldyna jumys istese, arasynda stýdent zııan kóredi - T.Balyqbaev

ASTANA. QazAqparat - Jumys berýshi óz aldyna, oqý orny óz aldyna jumys istese, arasynda stýdent zııan shegedi. Búgin «Ekspert» klýbynyń «Qazir qazaqstandyq bilim básekege qabiletti me?» atty taqyrypta ótken otyrysynda QR Bilim jáne ǵylym vıtse-mınıstri Tahır Balyqbaev osyndaı oıyn bildirdi.

«Árıne, bir jaǵynan alyp qarasaq, stýdent oqý jyldary óz salasynda jumys istep tájirıbe jınaǵany - quptarlyq is. Degenmen, stýdenttiń oqý ornyndaǵy mıssııasy - bilim alý. Ideıasy - oqý. Óz mamandyǵy boıynsha jumys taýyp alǵan stýdentke jumys berýshi belgili bir talap qoıatyny anyq. Osylaısha, jumystan bosamaǵan ol oqýyna úlgermeıdi. Sondyqtan, bizdiń negizgi maqsatymyz - oqý men óndiristi ushtastyrý. Kóp aıtatyn dýaldi bilim berý júıesin jetildirý. Qazir stýdentterdiń óndiristik praktıkasyn zańǵa mindetti etip engizip jatyrmyz»,-deıdi vıtse-mınıstr.

T.Balyqbaevtyń aıtýynsha, «jumys berýshi-oqý orny-stýdent» degen júıe bir izge qoıylsa, bilim básekege qabiletti, al mamandar bilikti bolady.

«Memlekettik ındýstrııalyq-ınnovatsııalyq damý baǵdarlamasynyń aıasynda «kásiporyn-oqý orny-stýdent» úsheýi kelisim quratyn praktıka bar. Stýdent óziniń bilimin óndiriste jetildire túsedi de oqý bitkennen keıin sol jerde jumys isteıdi. Sondyqtan, meniń oıymsha, osy baǵyt durys. Sebebi, jumys berýshi óz jaıynda, oqý orny óz jaıynda bolsa, ekeýiniń ortasyndaǵy stýdent zııan kóredi»,-deıdi T.Balyqbaev.