Kásipodaqtardaǵy zeınetkerlik jastaǵy adamdar 50 paıyzdan asyp ketti

ASTANA. QazAqparat - Kásipodaqtar jumysyna jastardy tartý kerek. Bul týraly búgin Avtomobıl jáne aýyl sharýashylyǵy mashına qurylysy halyqaralyq kásipodaqtar birlestigi keńesiniń otyrysynda QR Kásipodaqtary federatsııasynyń tóraǵasy Ábilǵazy Qusaıynov málim etti.

«Kadrlyq saıasatqa toqtalatyn bolsaq, kásipodaqtar jumysynda jastar bolmasa, onda kásipodaqtardyń bolashaǵy bulyńǵyr ekenin kóbi umytyp bara jatqan sekildi. Búginde bul turǵydaǵy jaǵdaı máz emes. Kásipodaqtardyń basshylyq quramynyń 50 paıyzdan astamy zeınetkerlik jastaǵy adamdar, sonymen qatar olardyń keıbiri 70-ten asyp ketken»,-dedi tóraǵa.

Osy oraıda ol ótken jyly atqarýshy komıtettiń otyrysynda jergilikti jerlerde 55-60 jastan aspaıtyn kadrlar rezervin qurý sheshimi jasalǵanyn atap ótti. Búginde barlyq múshelik uıymdarda 85 paıyz kadrlar rezervi jasaqtalǵan jáne olardyń biliktiligin jetildirý jumystary júrgizilýde.

Á. Qusaıynovtyń paıymynsha, kásipodaqtarda qyzmet etetin egde jastaǵy qyzmetkerler, ıaǵnı 70-ten asqan adamdar eń aldymen ózderiniń densaýlyǵymen aınalysýy kerek.