Kásipodaqtar týraly jańa zań jumysshyny kemsitýshilikke jol bermeýi tıis - R. Sárpekov
ASTANA. QazAqparat - Kásipodaqtar týraly jańa zań jumysshyny kemsitýshilikke qarsy problemalardy sheshýi tıis. Búgin Parlament Májilisinde «Kásiptik odaqtar týraly» zań jobasyn talqylaý barysynda depýtat Ramazan Sárpekov osylaı málim etti.
«Jańa zań mıllıondaǵan eńbekkerlerdiń múddesin qorǵaýy tıis. Al qoldanystaǵy 1993 jyly, 21 jyl buryn qabyldanǵan «Kásiptik odaqtar týraly» zań búgingi talaptarǵa jaýap bermeıdi. Qazir elimizdiń áleýmettik ekonomıkalyq damýy, qoǵamdyq turmystaǵy da ózgerister, jumys berýshiler men jumysshylar arasyndaǵy shıelenister túrli deńgeıge kóterilip ketti. Sol úshin jańa zańnyń qajettiligi ózekti», - dep atap ótti depýtat Ramazan Sárpekov. Sonymen qatar, depýtat jańa zańnyń eńbek qatynastaryndaǵy birqatar ózekti máselelerdi sheshýge septigin tıgizýi tıistigin atap ótti. Onyń aıtýynsha, jańa zań jobasy qabyldansa, ol búgingi kúni qordalana bastaǵan birqatar ózekti máselelerdi sheshýi tıis. «Birinshiden, kásipodaqtardyń rólin arttyrý kerek. Ekinshiden, jumys berýshi men jumysshy arasyndaǵy áleýmettik dıalog qalpyna kelýi shart. Kóp másele daý-damaıǵa ulaspaı-aq, alǵashqy satyda eńbekkerler men jumys berýshi arasynda sheshimin tabýy tıis. Budan basqa, eńbek daýlaryn sheshýde kásiptik odaqtar tıimdi qural retinde qaralýy qajet. Sonymen qatar, jumysshyny kemsitýge jol berilmeýi kerek. Sonyń ishinde, ásirese batys oblystarynda, munaıly óńirlerde qazaqstandyq azamattar men sheteldik jumysshylar arasyndaǵy jalaqyǵa qatysty kemsitýshilikter oryn alǵany belgili. Osynyń bárin kásiptik odaqtar týraly jańa zań tıimdi sheshse ıgi», - dedi depýtat R. Sárpekov.
