Kásipodaqtar qazaqstandyqtardy mamandyqtaryn aýystyrýǵa shaqyrdy
Federatsııa kásiporyndardy tsıfrlandyrý men avtomattandyrý nátıjesinde azamattardyń jumyssyz qalmaý joldaryn qarastyrýǵa nıetti.
«Prezıdenttiń Joldaýy - bizdiń aldymyzda turǵan syn-qaterlerge jaýap. (...) Ónerkásiptik revolıýtsııa - ári múmkindik, ári táýekel. Jańa tehnologııalyq tártiptiń jumys oryndaryn ońtaılandyratyny anyq. Osyny der kezinde uǵynyp, jumysshylarǵa ózgeristerdiń nelikten oryn alǵanyn, jańa mamandyqtardy ıgerýge qandaı múmkindikter bar ekenin túsindirýimiz kerek. Qazaqstandyqtardyń óz áleýetin baǵamdap, jańa ózgeristerge daıyn bolýyna kómektesýimiz kerek», - dedi jýrnalısterge QR Kásipodaqtar federatsııasynyń tóraǵasy Baqytjan Ábdiraıym.
Onyń pikirinshe, naqty tabys ákelmeıtin mamandyqtar qaýip aldynda tur. Sondaı-aq, biliktiligi tómen eńbek mamandyqtary, mehanıkalyq qaıtalaný protsesi bar mamandyq túrleri kúnnen-kúnge azaıyp keledi.
«Máselen, 5-6 jyl buryn Astanada halyqaralyq qońyraý shalý pýnkti bolatyn, qazir ol jabyldy. Dál osylaı kóptegen mamandyqtar joǵala beredi. Tipti zańgerlerdiń ózi baǵdarlamalaý formatyna aýysyp jatyr. Quqyq salasynda týyndaıtyn máselelerdiń 90 paıyzyn standarttaýǵa bolady. Adam advokatqa nemese zańgerge baryp, áýre bolmaıdy, onyń ornyna arnaıy baǵdarlama jaýap beredi. Sberbank 3 myń zańgerdiń qyzmetinen bas tartty, ıaǵnı bir baǵdarlama 3 myń adamnyń jumysyn atqarady», - deıdi B. Ábdiraıym.
Aıta keteıik, 10 qańtarda Qazaqstan Respýblıkasynyń Prezıdenti Nursultan Nazarbaevtyń Qazaqstan halqyna «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy jarııalandy.
