Kásipodaqtar federatsııasy jańa zańdy jedel qabyldaýdy talap etýde
ASTANA. QazAqparat - Qoldanystaǵy «Kásiptik odaqtar týraly» zań is júzinde jumys istep jatqan joq. Sondyqtan da, jańa zańdy qabyldaýdy tezdetý kerek. Búgin Parlament Májilisinde kásipodaqtardy jetildirý máselesine arnalǵan konferentsııa barysynda QR Kásipodaqtar federatsııasynyń tóraǵasy Ábilǵazy Qusaıynov osyndaı másele kóterdi.
«Ýaqyttyń zamanaýı talaptary, sonyń ishinde jahandyq daǵdarys áleýmettik eńbek qatynastarynyń jańa formalaryn qurǵandyqtan, eńbek daýlary men qaqtyǵystaryn sheshýdiń tyń tásilderin oılap tabýdyń qajettiligi artyp otyr. 2010 jyldan bastap bizdiń elimizde de jaǵdaı kúrt ózgerdi. Biz eńbek daýlary men qaqtyǵystarynyń júıeli túrde óskenin baıqap otyrmyz», - deıdi Ábilǵazy Qusaıynov.
Onyń aıtýynsha, búgingi kúni qaıshylyqtardy syndarly áleýmettik dıalogsyz sheshý esh múmkin emes. Bul rette eń aldymen áleýmettik áriptestiktiń tıimdi tetikterin qalyptastyrý mańyzdy. Al ol boıynsha kásiptik odaqtar eńbek qatynastaryn retteıtin negizgi quralǵa aınalýy shart.
«Bul máselede múddeler teńgeriminiń saqtalýy, áleýmettik ádildikti qamtamasyz etý sharalary asa ózekti mánge ıe. Osyǵan oraı, Memleket basshysy Qazaqstannyń kásipodaqtar qozǵalysynyń qyzmetine qatysty ádil syn aıtyp, olardyń eńbek daýlaryn sheshýge qabiletsiz ekenin, naqty sheshim qabyldaı almaıtynyn atap ótken bolatyn. Toqtala ketetin jaıt, bizdegi 1993 jyly qabyldanǵan zań qazir is júzinde jumys istemeıdi desek te bolady», - dedi ol.
Osyǵan oraı, Kásipodaqtar federatsııasynyń basshysy zań normalarynyń olqylyqtyǵyna qatysty birqatar mysaldardy alǵa tartty. Máselen, onyń aıtýynsha, «Qazaqmys» kásiporyndarynda qazirgi tańda úsh birdeı kásipodaq qyzmet etedi. Alaıda, solardyń bir de bireýi tıimdilik tanytpaǵan. Kezinde ýshyqqan jumysshylardyń «taý-ken óndirisi jaǵdaıyndaǵy tómengi jalaqy týraly» kótergen máselelerine de kásipodaqtar esh mán bermegen.
«Taý-ken óndirisi salasynda 70 myń teńgemen eń tómengi jalaqy alyp kelgen jumysshylar boldy. Osyǵan oraı, jumysshylar másele kóterdi, al osy kezde kásipodaqtardyń úsheýi de qaýqarsyz boldy. Jalpy, elimizdegi jaǵdaı qyzyq, bir kásiporynda úsh birdeı kásiptik odaq bola tura, sol úsheýi ózderiniń arasynda daýlasyp, kim myqty, kim kúshti, degenge deıin barady. Budan qandaı jumys, qandaı qorytyndy shyǵarýǵa bolady», - deıdi Á. Qusaıynov. Onyń sózine qaraǵanda, osyndaı keleńsizdikterdi boldyrmaý úshin keshendi jumystar atqarylýy qajet. Sonyń mańyzdysy jańa zań qabyldaý.
«Álbette, kásiptik odaq qozǵalysy salasynda rettelmegen máseleler shash etekten. Olardy tipti bir ǵana zań aktileri arqyly sheshý de múmkin emes. Degenmen, meniń oıymsha, búgingi tańdaǵy eń basty másele - zań jobasyn Parlamentte jedeldetip qabyldaý. Biz shyn máninde bul zańdy qabyldaýdy tym uzaqqa sozyp jiberdik, talqylaýdan ary asqan joqpyz. Al esesine kásiptik odaq qozǵalystary quldyrap barady, eńbek daýlary órshý ústinde. Osynyń bárin shetinen retteýge jańa redaktsııadaǵy zań óz septigin tıgizer edi», - dedi Kásipodaqtar federatsııasynyń basshysy.
