Kásipodaqtar federatsııasy úndeý jarııalady

«Búgingi tańda bizdiń elimiz álemniń kóptegen elderi sııaqty qıyn kezeńderdi bastan ótkerýde. Munaı baǵasynyń quldyraýy jáne koronavırýstyq pandemııa Qazaqstan úshin tótenshe syrtqy qaýip bolyp tur. Koronavırýstyq ınfektsııanyń taralýyn boldyrmaý máselesi el basshylyǵynyń baqylaýynda. Kásipodaqtar federatsııasy Prezıdenttiń tótenshe jaǵdaıdy engizý týraly sheshimin, Qazaqstan Respýblıkasy Úkimetiniń bıýdjet shyǵystaryn azaıtý, aımaqtardaǵy jumyspen qamtýdy qamtamasyz etý jáne eldiń aqsha-qarjy naryǵyn turaqtandyrý jónindegi sharalar qabyldaý qajettigi týraly úndeýin qoldaıdy», - delingen Úndeýde.

Sonymen qatar, federatsııa óz múshelerine, áleýmettik áriptesterge oryn alǵan qaýipterdi azaıtý men qoǵamdaǵy jaǵdaıdy turaqtandyrý úshin kúsh biriktirý qajet ekendigin jetkizedi.

«Atap aıtqanda, Qazaqstan Respýblıkasynyń Úkimetin, jumys berýshiler men ekinshi deńgeıli bankterdi:

- qoǵamdaǵy áleýmettik turaqtylyqty saqtaý sharalaryn qabyldaý kezinde áleýmettik áriptestiktiń barlyq taraptarynyń pikirin eskerý men súıenýge;

- jumysshylardyń jappaı bosatylýyna, jalaqy boıynsha bereshek pen áleýmettik aýdarymdardyń tólenbeýine, jalaqynyń tómendeýine, eńbek jaǵdaıynyń negizsiz nasharlaýyna jol bermeýge;

- qyzmetkerlerdi jeke qorǵanysh quraldarymen qamtamasyz etý, jumys oryndary men keńselerde qaýipsiz jaǵdaılar jasaý, jumys rejımin qazirgi zamanǵy baılanys quraldaryn qoldana otyryp, qashyqtan jumys isteý jolymen qalyptasqan jaǵdaıǵa beıimdeýge;

- tótenshe jaǵdaı engizilgen merzimde nesıelik tólemder men paıyzdyq ósimderdi tóleýden ýaqytsha bosatý múmkindigin qarastyrýǵa shaqyramyz», - delingen Úndeýde.

«Salalyq kásipodaqtarǵa, kásipodaqtardyń aýmaqtyq birlestikterine, kásipodaq uıymdaryna, kásipodaq múshelerine:

- áleýmettik áriptestermen birigip qoǵamda áleýmettik turaqtylyqty saqtaýǵa at salysýdy, eńbek ujymdarynda tótenshe jaǵdaı talaptaryn saqtaý qajettiligi týraly túsindirý jumystaryn júrgizýdi;

- jumysshylardyń jappaı jumystan shyǵarylýyn boldyrmaýǵa, eńbekaqy men áleýmettik tólemderdi ýaqtyly tóleýge kásipodaqtyq baqylaýdy kúsheıtýdi;

- eńbek zańnamasynyń, ujymdyq sharttardyń saqtalýyn baqylaýdy kúsheıtýdi;

- áleýmettik áriptestermen birge jumys berýshilermen keńese otyryp, eńbek zańnamasynyń saqtalýy máselelerindegi atap aıtqanda, eńbekaqynyń ýaqtyly tólenýin, kásiporyn jumysy májbúrli toqtaǵandaǵy jáne ýaqytsha eńbekke jaramsyzdyq tólemin tóleýdi, karantınge baılanysty úıde balalarymen otyrýǵa májbúr bolǵan qyzmetkerlerge aqyly eńbek demalysyn berýdi, qyzmetkerlerge aıyppulsyz bos ýaqyt berý jáne kesteden tys eńbek demalysyn berý múmkindikterin qarastyrý jumystaryn jandandyrýdy;

- vırýstyń ýaqtyly anyqtalýy jáne onyń taralýyn boldyrmaýda aýyzbirshilik tanytyp, medıtsınalyq qyzmetterdiń jumysyna kómektesýdi;

- qoǵamda dúrbeleń týdyrmas úshin ujymdarda medıtsınalyq qyzmetkerlerdiń qatysýymen aýrýdan aıyǵý oqıǵalaryn eskerte otyryp, aýrýdyń aldyn-alý sharalaryn, sonymen qatar jeke bas gıgıenasy, tamaqtaný jáne t.b máselelerdi egjeı-tegjeıli túsindirý jumystaryn júrgizýdi;

- túrli áleýmettik-eńbek máselelerin (qyzmetkerlerdi jumystan bosatý, jalaqyny tólemeý, eńbek jaǵdaıynyń nasharlaýy, eńbek zańnamasynyń buzylýy jáne t.b.) sheshý maqsatynda bastaýysh kásipodaq uıymy jáne kásipodaq múshelerimen tikeleı baılanys ornatýdy;

- jumysshylardyń quqyqtary buzylǵan jaǵdaıda habarlasý úshin áleýmettik jelilerde «jedel jeli», Kásipodaq ortalyqtarynda senim telefondarynyń úzdiksiz jumys isteýin qamtamasyz etýdi;

- jumysshylardyń ótinishterine jedel jaýap berý úshin kásipodaqtardyń zań qyzmetterin onlaın rejımine kóshirý qajettiligin qarastyrýdy usynamyz.

Barlyq azamattardy úreıge boı aldyrmaı, qaýipsizdik erejelerin saqtaýǵa jáne azamattyq jaýapkershilik kórsetýge shaqyramyz.

Adam ómirin qorǵaý basqa qundylyqtardyń bárinen joǵary turýy tıis. Qıyndyqty birlesip qana eńsere alamyz. Sondyqtan aýyzbirshilik tanytaıyq.

Atalǵan qaýipterdi azaıtý boıynsha bizdiń birlesken is-qımyldarymyz jáne belsendi jumysymyz azamattardyń áleýmettik ál-aýqatyn, ómiri men densaýlyǵyn saqtaýǵa yqpal etetinine senimdimiz», - delingen úndeý mátininde.