Kásipodaqtar federatsııasy Parlament saılaýyna baıqaýshy retinde qatysady
«Keler jyldyń qańtarynda Parlament Májilisi men máslıhat depýtattarynyń saılaýy ótedi. Qazaqstandaǵy eń iri qoǵamdyq birlestik retinde Kásipodaqtar federatsııasy mańyzdy ishki saıası protsesterden tys qala almaıdy. Sondyqtan Kásipodaqtar federatsııasy QR Parlamenti Májilisi depýtattarynyń saılaýyna eldiń saılaý zańnamasynyń barlyq normalarynyń saqtalýyn baıqaýshy retinde qatysýǵa nıetti», - dedi Nur-Sultan qalasy Kásipodaqtar ortalyǵy tóraǵasynyń mindetin atqarýshy Tólegen Kúnádilov elordada ótken brıfıngte.
Onyń aıtýynsha, bıliktiń zań shyǵarýshy tarmaǵynda eńbek adamynyń múddelerin alǵa tartatyn adamdar kirse, jumysshylardyń quqyqtaryn qorǵaýǵa baǵyttalǵan ortaq kúsh-jiger jańa serpin alady.
«Sonymen birge, bizdiń áleýmettik áriptesterimizben yntymaqtastyqqa negizdelgen birlesken jumys qana qoǵamnyń negizgi demokratııalyq qundylyqtaryn saqtaýda aıtarlyqtaı jetistikke jetýge múmkindik beredi. Birlik, ádilet jáne damý - QR Kásipodaqtar federatsııasy qyzmetiniń basty qaǵıdattary», - dedi T. Kúnádilov.
Federatsııa Qazaqstan boıynsha myń jarymǵa jýyq saılaý ýchaskelerin qamtýdy josparlap otyr. Ár ýchaskege eki adamnan, jalpy úsh myńnan astam baıqaýshy darıalaý kózdelgen.
