Kásipodaqtar federatsııasy men Nur-Sultan ákimdigi ózara yntymaqtastyq jóninde kelisti
Búgin QR Kásipodaqtar úıinde QR Kásiptik odaqtar federatsııasynyń tóraǵasy Eraly Toǵjanov Nur-Sultan qalasy ákimi Altaı Kólginovpen kezdesip, ózara yntymaqtastyq týraly memorandýmǵa qol qoıdy.
Kezdesýge elordadaǵy otyz qurylys kompanııasynyń basshylary qatysty.
Memormandým elordanyń jumys berýshileri, kásipkerleri, kásipodaq belsendilerimen eńbek zańnamalarynyń normalary men talaptaryn oryndaýdaǵy birlesken jumysyn jańa deńgeıge kóterýge baǵyttalǵan.
Óz baıandamasynda QR Kásiptik odaqtar federatsııasynyń tóraǵasy Eraly Toǵjanov áleýmettik áriptester aldynda turǵan basty mindetterge toqtalyp ótti.
2019 jylǵy 26 qarashada bolǵan Úkimet otyrysynda Eraly Toǵjanov, Nur-Sultan qalasynyń ujymdyq shartpen qamtý boıynsha tómengi kórsetkishke ıe óńirlerdiń qatarynda ekenin atap ótken bolatyn. ıAǵnı bul kórsetkish 15,2%. Elordada jumys istep turǵan 50 095 kásiporynda bar bolǵany 7 043 ujymdyq shartqa qol qoıylǵan. Osyǵan oraı federatsııa tóraǵasy jumysshylardyń eńbek jáne áleýmettik-ekonomıkalyq quqyqtaryn qorǵaý maqsatynda ujymdyq sharttardy bekitý boıynsha jumysta belsendilik qajettigin atap ótti.
Sonymen qatar, ol ákimdikte jalaqy men kásiporyndardaǵy jaraqattaný máseleleri boıynsha apta saıyn kezdesetin arnaıy jumys toby bar ekenin aıtty.
QRKF tóraǵasy mysal retinde «Shar-Qurylys» jáne «GLB» JShS-terinde jalaqy qaryzy boıynsha sheshimin tapqan jaǵdaıdy keltirdi. Atalǵan kompanııalar 2019 jyldyń maýsymy men qyrkúıegi aralyǵynda 747 jumysshyǵa 467,5 mln. teńge qaryz bolǵan. Qazir kompanııa basshylyǵy ákimdiktiń qoldaýymen bul máseleni tolyǵymen sheshti.
Sonymen qosa, kezdesýde bastaýysh kásipodaq uıymynyń sanyn kóbeıtý qajettiligi de aıtyldy.
Búgingi kúni Nur-Sultanda 467 kásipodaq uıymy bar. Múshelerdiń sany - 123 952 .
QRKF tóraǵasynyń aıtýynsha, bul baǵytta ásirese shaǵyn jáne ortas bızneske basa nazar aýdarylýy tıis.
Sonymen qatar, Eraly Toǵjanovtyń aıtýynsha, óndiristik keńester arqyly qoǵamdyq baqylaýdy kúsheıtý qajet. Qazir bas qalada 473 óndiristik keńes bar. Tehnıkalyq ınspektorlar sany 521. Jyl basynan beri Nur-Sultandaǵy kásiporyndarda 46 adam zardap shegip, 11 adam kóz jumǵan. Sondyqtan, QRKF tóraǵasy kásiptik aýrýlar men óndiristik jaraqatty tómendetýge aıyryqsha kóńil bólinýi tıis dedi.
Qala ákimi Altaı Kólginov óz kezeginde kásiporyndardy ujymdyq shartpen qamtý boıynsha shaǵyn bıznespen belsendi jumys jasaý kerektigin atap ótti. Onyń aıtýynsha, jumysshylardyń eńbek jaǵdaıyn jaqsartýǵa Kásiptik odaqtar federatsııasymen birlese otyryp qol jetkizý qajet.
Altaı Kólginovtiń aıtýynsha, memorandým aıasynda elorda kásiporyndaryn ujymdyq shartpen keńinen qamtý boıynsha birlesip jumys jasaý josparlanyp otyr. Bul ekonomıkalyq jáne áleýmettik ósimniń negizgi faktory bolyp sanalatyn saý jumys kúshin qurýǵa múmkindik beredi.
«Barlyǵy ujymdyq shartta jazylýy kerek jáne jumysshynyń quqyǵy qorǵalýy tıis. Birinshi kezekte jalaqy qaryzyna jol bermeýimiz kerek jáne qaýipsizdik tehnıkasynyń saqtalýynda muqııat bolýymyz qajet. Biz ákimdik, kásipodaq jáne kásiporyn udaıy birlesip baqylaıtyn bolamyz»,-dep atap ótti Nur-Sultan ákimi.
Memorandýmǵa qol qoıǵan eki taraptyń aıtýynsha, ujymdyq shartqa qol qoıýdyń arqasynda elordada jaraqattaný boıynsha jaǵdaı jaqsarǵan. 2014 jyly 111 jazataıym oqıǵa tirkelse, onyń 36-sy adam ólimimen aıaqtalǵan. Bıyl 46 jazataıym oqıǵa tirkelip, 11 adam kóz jumǵan.
Kezdesý sońynda QRKF tóraǵasy Eraly Toǵjanov Nur-Sultan qalasynyń ákimi Altaı Kólginovke kásipodaqtardyń «Úzdik áleýmettik áriptes» tósbelgisin tabys etti.
