Kásipodaqtar federatsııasy áleýmettik seriktestik týraly zań qabyldaýdy usyndy

ASTANA. QazAqparat – QR Kásipodaqtar federatsııasynyń uıymdastyrýymen ótip jatqan «Jańa qoǵamdyq kelisim: Ádiletti eńbek qatynastary» atty áleýmettik áriptester forýmynda áleýmettik seriktestik týraly zań qabyldaý usynyldy, dep habarlaıdy QazAqparat tilshisi.

Mundaı bastamany QR Kásipodaqtar federatsııasynyń tóraǵasy Satybaldy Dáýletalın kóterdi.

«Qazaqstanda áleýmettik áriptestikti jetildirýdiń eki baǵytyn damytýǵa bolady. Birinshiden, kásipodaqtar men jumys berýshiler birlestikteriniń qyzmetin retteıtin jańa strategııalyq qujat ázirleý qajet. Ekinshiden, áleýmettik-eńbek qatynastaryn retteý jónindegi respýblıkalyq úshjaqty komıssııa qyzmetiniń tıimdiligin arttyrý kerek», - dedi federatsııa basshysy.

Onyń aıtýynsha, atalǵan komıssııalardyń mańyzyn arttyryp, eńbek qatynastaryn retteýdegi rólin kúsheıtý úshin «Áleýmettik seriktestik týraly» zań ázirlep, qabyldaý qajet.

«Áleýmettik seriktestiktiń mazmuny eńbek adamyn qurmetteý, azamattardyń eńbegin qurmetteý, eńbek qatynastary taraptarynyń múddelerin qurmetteý sııaqty úsh qaǵıdatqa negizdelýi kerek. Áleýmettik seriktestikti nyǵaıtý úshin oǵan ekonomıkalyq jáne uıymdastyrýshylyq baza jasalýy kerek. Jaldamaly jumysshylarǵa kásiporyn menshiginen úles alý, aktsııalardyń baqylaý paketin ıelený, kásiporyndy basqarýǵa qatysý (baqylaý keńesterine múshelik etý, ár túrli komıssııalarǵa múshe bolý) múmkindikteri osy zań aıasynda berilýi kerek», - dedi Satybaldy Dáýletalın.