Kásipodaqtar birlestigi 200 adamdy 8 mamandyqqa oqytpaq - OQO
ShYMKENT. QazAqparat - Ońtústik Qazaqstan oblysyndaǵy Kásipodaqtar birlestigi 8 mamandyq boıynsha 200 adamdy oqytatyn bolady. Bul týraly óńirlik kommýnıkatsııalar qyzmetinde ótken brıfıngte «Ońtústik Qazaqstan oblysynyń kásipodaqtar ortalyǵy» aýmaqtyq kásipodaqtar birlestiginiń tóraǵasy Berik Bekjanov málim etti, dep habarlaıdy QazAqparat tilshisi.
Birlestik tóraǵasynyń sózinshe, «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda aǵymdaǵy jyldyń 1 maýsymynan qyrkúıek aıyna jumyssyz azamattar tegin oqytylatyn bolady. Kásipodaqtyń oqytý ortalyǵynda turǵyndardy toqymashy, aspaz, júrgizýshi, jıhaz qurastyrýshy sekildi 8 mamandyqqa oqytý kózdelýde. Qazirgi tańda Qazaqstannyń kásipodaqtar Federatsııasy quramynda 221 752 adam ońtústiktiń azamattary bolyp otyr.
«Jalpy kásipodaq birlestigi barlyq sala jumysshylarynyń eńbekaqy jáne qaýipsiz jumys jaǵdaıy máselelerin, eńbek demalysyn der kezinde alý men ózge de máselelerdi sheshý úshin birigetin qoǵamdyq uıym. Máselen, 2008 jyly oblystaǵy jumys istep turǵan 16 000 kásiporynnyń ishinde tek 1 853-inde ǵana óz jumysshylarmen kelisimshart jasalǵan. Bul - 11,6 paıyz degen sóz. Al qazirgi tańda quramynda kásipodaq uıymdary bar kásiporyndar men uıymdardaǵy ujymdyq kelisimshart jasasý úlesi 42 paıyzdy qurap otyr», - dedi Berik Bekjanov.
Aıta ketereligi, kásipodaq jarnalary boıynsha qarajattyń orta eseppen 70 paıyzy bastaýysh kásipodaq uıymdarynda qalyp, al 30 paıyzy kásipodaq apparatynyń qalypty jumys isteýi úshin oblystyq jáne respýblıkalyq deńgeıdegi kásipodaqtarǵa bólinip keledi.
«Bastaýysh kásipodaq uıymdary ózderiniń kásipodaq jınaqtaryn óz ujymyndaǵy kez kelgen is-sharaǵa jumsaýǵa quqyly. Buǵan deıin áleýmettik tólemder kásipodaqtarǵa baǵyttalyp, uıymdar jumysshylar úshin joldamalardy satyp alyp, olardy óz baǵasynan 90 paıyz arzan nemese tegin taratyp keldi.
Aıta keteıik, ótken jyly 10 salalyq kásipodaqta 4100 adam saýyǵýǵa joldama alǵan. Onyń ishinde 3000-ǵa jýyq joldama OQO bilim berý jáne ǵylymı qyzmetkerleriniń oblystyq kásipodaq komıtetine tıesili, ol maqsatta 160 mıllıonnan astam teńge bólingen bolatyn», - dedi Berik Bekjanov.
Sonymen qatar, óńirdegi kásipodaq birlestigi oblystyq sotpen áriptestikti jalǵastyrmaqshy. Bul turǵyda jumysshylardyń eńbek quqyǵyn qorǵaý maqsatynda aýmaqtyq kásipodaq ortalyǵynda is-sharalar jospary túzilgen. Onyń birinshi baǵyty boıynsha tatýlastyrý qyzmetteri ortalyǵyn quryp, eńbek daýlaryn sotqa deıin sheshý kózdelip otyr.
