Kásipodaqtar 2,8 mln qazaqstandyqtyń jumys ornyn saqtap qalýyna yqpal etti
ASTANA. QazAqparat - Kásipodaqtar 2,8 mln qazaqstandyqtyń jumys ornyn saqtap qalýyna yqpal etken. Bul týraly Qazaqstan Prezıdenti Nursultan Nazarbaev Astanada ótken QR Kásipodaqtar federatsııasynyń kezekten tys XXV seziniń qatysýshylaryna quttyqtaý sózinde málim etti.
Aıta keteıik, Qazaqstan Prezıdenti Nursultan Nazarbaevtyń quttyqtaý hatyn QR Memlekettik hatshysy Gúlshara Ábdiqalyqova oqyp bergen bolatyn. Óz sózinde Memleket basshysy Qazaqstan qoǵamyndaǵy kásipodaq qozǵalysynyń úlken bedelin atap ótti. Onyń aıtýynsha, búginde qazaqstandyq kásipodaq uıymdary eńbekkerler quqyqtaryn tabysty qorǵap, eńbek jaǵdaıy men qaýipsizdikti jaqsartyp keledi.
«Bizdiń basty uranymyz «Turaqty kásiporyn - turaqty qoǵam - turaqty el» dep atalady. Turaqtylyq kez kelgen qoǵamnyń basty qundylyǵy bolyp sanalady. Eger qyzmetker kásiporynnyń turaqty damyp jatqanyn, óziniń áleýmettik turǵyda jáne zań júzinde qorǵalǵanyn sezse, otbasynda da barlyǵy jaqsy bolady. Bul ózara baılanysty úderis», - degen edi Baqytjan Ábdiraıym QR Kásipodaqtar federatsııasynyń sezinde.
Sondaı-aq jıynda Qazaqstannyń birqatar óńirlerinen kelgen túrli salalardaǵy kásipodaqtardyń ókilderi - «Lokomotıv qurastyrý zaýyty» AQ kásipodaq komıtetiniń tóraǵasy Nurlybek Jumash, «Mańǵystaýmunaıgaz» AQ jumyskeri Anar Nuǵmanova, Qaraǵandy oblysy Qarqaraly aýdandyq bilim bóliminiń ádiskeri Nıkolaı Smolın men Jambyl oblysy Kásipodaq ortalyǵynyń tóraǵasy Meırambek Tólepbergen sóz sóıledi.
Buǵan deıin habarlaǵanymyzdaı, jalpy QR Kásipodaqtar federatsııasy seziniń jumysyna QR Eńbek jáne halyqty áleýmettik qorǵaý mınıstri Mádına Ábilqasymova men Halyqaralyq eńbek uıymynyń Qazaqstandaǵy ulttyq úılestirýshisi Talǵat Ómirjanov, Qazaqstannyń barlyq óńirlerindegi salalyq kásipodaq uıymdary atynan 200-den astam delegat qatysýda.
