Kásipodaq ustazdar men ǵalymdardy saılaýǵa belsene qatysýǵa shaqyrdy

NUR-SULTAN. QazAqparat - 730 000 múshesi bar eń iri qoǵamdyq uıym - Bilim jáne ǵylym qyzmetkerleri kásipodaǵy óz múshelerin saılaýǵa belsene qatysýǵa shaqyrdy. Bul týraly kásipodaqtyń baspasóz qyzmetine silteme jasap QazAqparat habarlaıdy.

«Búgin Memleket basshysy Qasym-Jomart Toqaev 9 maýsym kúni QR Prezıdentiniń kezekten tys saılaýyn ótkizý týraly sheshimin jarııalady. Eldegi eń úlken qoǵamdyq uıym retinde Qazaqstandyq salalyq bilim jáne ǵylym qyzmetkerleriniń kásiptik odaǵy Prezıdenttiń atalǵan sheshimin jáne ony ádil ári ashyq ótkizýge kepildik beretindigi týraly prezıdent málimdemesin qoldaıdy jáne joǵary baǵalaıdy. Kásipodaq músheleri osy kezge deıin de QR Prezıdentiniń jáne QR Parlamenti depýtattarynyń saılaýyna qatysyp, óz tańdaýyn jasap keldi. Sondyqtan, odaq óziniń 700 myńnan astam múshesin aldaǵy saılaý naýqanyna belsendi qatysyp, saıası tańdaý jasaýǵa shaqyrady» delingen habarlamada.

Aıta ketý kerek, 95 jyldyq tarıhy bar Qazaqstandyq bilim jáne ǵylym qyzmetkerleri kásiptik odaǵy - eldegi eń iri qoǵamdyq uıym.

Eske sala ketsek, aǵymdaǵy jyldyń 9 maýsymynda elimizde kezekten tys prezıdent saılaýy ótedi. Bul týraly búgin respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev aıtty. Memleket basshysy Qasym-Jomart Toqaevtyń respýblıkalyq telearnalar arqyly Qazaqstan halqyna joldaǵan úndeýiniń tolyq mátinin myna siltemeden oqýǵa bolady.