Kásipodaq tóraǵasy: Bizdi BAQ eńbek oryndarynda oqys oqıǵa bolǵanda ǵana eske alatyn
Bas keńestiń jıynynda kásipodaq ujymy bul saılaýǵa qalaı daıyndalǵanyn, kimderdiń arqasynda naýqandy óz deńgeıinde ótkenin eske alyp, esep berdi.
Federatsııa tóraǵasy Baqytjan Ábdiraıym bul saılaý kásipodaq salasynda qordalanǵan máselelerdiń Úkimettik deńgeıde sheshimin taba bastaǵanyn aıtady.
«Jınaǵan daýsymyz kásipodaq músheleriniń sanynan az bolǵanyn bilemiz. Bul jerde ózimizden de kemshilikter ketýi múmkin. Jańa saılanǵan Prezıdenttiń biz usynǵan saılaýaldy baǵdarlamada kórinis tapqan máselelerdi baqylaýǵa alǵany qýantty. Bizdiń kandıdat kótergen máseleler men usynystardyń ózekti ekenin ataǵan Qasym-Jomart Toqaev aldaǵy jumysynda aıtylǵan dúnıelerdi basshylyqqa alatynyn atady. Kópten beri Eńbek kodeksine ózgerister men tolyqtyrýlar engizilmeı ketken. Ol da jańartylǵaly jatyr. Osynyń bári kásipodaq federatsııasynyń Prezıdent saılaýyna belsendi qatysýynyń arqasynda boldy dep esepteımiz. Qazaqstan kásipodaqtar federatsııasy 114 jyldyq tarıhynda birinshi ret óz kandıdatyn Prezıdenttike usynyp otyr. Sondyqtan, bul saılaý biz úshin tarıhı mánge ıe naýqan boldy», - deıdi Baqytjan Ábidraıym.
Federatsııa tóraǵasy eńbek qatynasynda ádildik ornatý máselesin kandıdat Amankeldi Taspıhov kótergendeı eshkim qozǵamaǵanyn aıtady.
«Bizdiń kandıdat medııa-tulǵa emes edi. Al baǵdarlamamyz naqty bir salaǵa ǵana qatysty boldy. Bizdi BAQ ókilderi eńbek oryndarynda oqys oqıǵa bolǵanda ǵana eske alatyn buǵan deıin. Al biz kúresetin dúnıeler kóp. Kóleńkeli bıznes, qanalǵan eńbekti qalpyna keltirý sııaqty bitip bermeıtin daýlarmen kúndelikti aınalysyp kelemiz. Kandıdatymyz elektoraldy naýqan kezinde Úkimet pen Parlamentke birneshe ret úndeý jasady. Bir aılyq úgit-nasıhat jumystarynyń arqasynda eńbek qaýipsizdigine qatysty ózekti problemalar sheshimin taýyp jatyr. Parlament kásipodaq uıymdarynyń mártebesin kóterýge nıet tanytyp, zańnamaǵa ózgerister engizbekshi. Osy turǵydan alǵanda bizdiń saılaý qarsańyndaǵy jumysymyz jelge ushqan joq», - deıdi kásipodaq basshysy.
Jıyn barysynda atalmysh saılaýǵa belsendi qatysqan federatsııa músheleri marapattaldy.
