Kásipodaq ókilderi resmı statıstıkadaǵy málimetterge senimsizdik tanytýda
ASTANA. Maýsymnyń 2-si. QazAqparat /Qanat Mámetqazyuly/ - Búgin QR Parlamenti Májilisi depýtattarynyń Qazaqstannyń Kásipodaqtar federatsııasynyń kezekti HHІІ seziniń qatysýshy delegatsııasymen kezdesýi barysynda kásipodaq ókilderi statıstıka salasyndaǵy olqylyqtardy aldyǵa tartty. Sonymen birge, kásipodaq basshylary mádenıet salasy qyzmetkerleriniń eńbekaqysyn arttyrý máselesin kóterdi,
dep habarlaıdy QazAqparat.
«Elimizde memlekettik statıstıka týraly arnaıy zań bar bolǵanymen, bul saladaǵy esepteýler ádisi, onyń ishinde jekelegen salalardyń ortasha aılyq jalaqysyn esepteý tásilderi úlken túsinbeýshilik týdyrady. Bul rette mádenıet qyzmetkerleriniń ortasha jalaqysyn esepteý ádisi de múldem qısynsyz. Máselen, byltyrǵy jyldyń qorytyndysy boıynsha Aqtóbe oblysyndaǵy mádenıet qyzmetkerleriniń ortasha jalaqysy respýblıkamyzda birinshi orynǵa shyǵypty. Sóıtsek, olardyń ortasha jalaqysy fýtbolshylardyń qalamaqysymen qosa eseptelip, 92 myń teńgeni quraıdy dep kórsetilgen eken. Shyndyǵyn aıtqanda, buny aıtýdyń ózi uıat, mádenıet qyzmetkerleriniń ortasha jalaqysy osylaı bolýy múmkin de emes», dedi Mádenıet salasy qyzmetkerleri kásipodaǵynyń tóraıymy Svetlana Shalahmetova. Onyń aıtýynsha, qazirgi tańda respýblıka boıynsha eń tómengi jalaqynyń birin osy mádenıet salasynyń qyzmetkerleri alyp otyr.
Sonymen qatar, kásipodaq ókili aldaǵy ýaqytta el bıýdjeti talqylanar tusta eń tómengi eńbekaqy deńgeıi men eń tómengi kúnkóris deńgeıine qatysty depýttardan birqatar máselege nazar aýdarýyn ótindi. «Jalpy, Májilis depýtattary kásipodaq ókilderin qatystyra otyryp, bul týraly parlamenttik tyńdaý ótkizse durys bolar edi», dedi S. Shalahmetova.
Sonymen birge, óńirler boıynsha Statıstıka agenttiginiń eseptegen málimetterinen olqylyqtardy aldyǵa tartqan kásipodaq ókilderi, birqatar alshaqtyqtardyń naqty oryn alyp otyrǵanyna nazar aýdartty. Máselen, ortasha jalaqynyń nomınaldyq kórsetkishi boıynsha Mańǵystaý oblysy birinshi orynda tur eken. Alaıda, resmı statıstıka boıynsha atalǵan óńirde tabysy eń tómengi kúnkóris mólsherinen az jurtshylyq sany 24,5 paıyzdy qurap, bul jóninen de birinshi orynǵa kóterilgen bolyp otyr.
