Kásipodaq qaqpashynyń quqyǵyn qorǵap qaldy
ATYRAÝ. QazAqparat - «Atyraý» klýby men qaqpashy Aleksandr Zarýtskıı arasyndaǵy kelisimshart buzdy. Taraptar arasyndaǵy daýdyń túıinin tarqatýǵa Qazaqstan fýtbolshylary kásipodaǵy kómektesken, dep habarlaıdy QazAqparat «SPORTINFORM» SAA silteme jasap.
«Atyraý» klýby qaqpashy Aleksandr Zarýtskıı men ýkraındyq jartylaı qorǵaýshy Sergeı Zagınaılovtyń qyzmetinen bas tartqan. Kelisimshartty merziminen buryn buzǵanyna qaramastan, klýb basshylyǵy olarǵa tıesili ótemaqyny tóletýden bast tartqan. Daýǵa Qazaqstan fýtbolshylary kásipodaǵy men sporttyq quqyq salasyndaǵy «SILA Internationals Lawyers» zań kompanııasy aralasyp, eki tarapty bir toqtamǵa keltirdi.
«Daý sheshildi. Dál qazir klýb basshylyǵyna meniń tarapymnan shaǵym joq. Aradaǵy kelisimshartty merziminen buryn buzǵandyqtan, olar maǵan ótemaqy tóledi. Osymen daý aıaqtaldy», - deıdi Aleksandr Zarýtskıı.
Bapkerler shtaby bul basshylyqtyń sheshimi ekenin aıtyp otyr.
«Mańyzdysy bul emes. Kúshtep súıkimdi bola almaısyń ǵoı. Fýtbolshynyń ómirinde mundaı oqıǵalar bolyp turady. Eń bastysy, biz túsinise aldyq», - deıdi ol.
Kásipodaq basshysy Fedor Sımınıdı bul daýdyń ońdy sheshilýine «Atyraý» klýbynyń basshylyǵy da múddeli bolǵanyn aıtady.
«Atyraý» klýbynyń basshylyǵy bul máseleni eki jaqqa da tıimdi etip sheshý úshin barlyǵyn jasady. Aleksandr Zarýtskıı qalaǵanyn aldy, onyń barlyq múddesi qorǵaldy. Meniń oıymsha, jaǵdaı durys sheshildi. Bul qýantady. Sondaı-aq, komandanyń basqa eki oıynshysy Sergeı Zagınaılovpen de, Aıbar Nurybekovpen de bir toqtamǵa keletin shyǵarmyz. Klýb basshylyǵy barlyǵy durys bolǵanyn jáne saýatty sheshilgenin qalap otyr», -deıdi Fedor Sımınıdı.
