Kásipqoı boksshylar Olımpıada oıyndaryna qatysa alady
ASTANA. QazAqparat - Lozannada 1 maýsymda AIBA - halyqaralyq boks qaýymdastyǵynyń kezekten tys kongresinde uıym jarǵysyna kásipqoı boksshylardyń áýesqoı jarystarǵa qatysýǵa shekteýin alyp tastaıtyn túzetý engizetin bolyp sheshti.
Kongreske Qazaqstandyq boks federatsııasynan QBF atqarýshy dırektory B. Bektenov pen halyqaralyq baılanystar jónindegi úılestirýshi Dınara Bolatbekqyzy qatysty. Azııa boks konfederatsııasynan onyń prezıdenti Serik Qonaqbaev qatysty.
Kezekten tys kongreske qatysqan, daýys berý quqyǵy bar 88 ulttyq federatsııadan 84 - onyń ishinde Qazaqstan boks federatsııasy - shekteýdi alyp tastaýǵa daýys berdi. 4 federatsııa qalys qaldy.
2013 jyly engizilgen AIBA qaǵıdasyna sáıkes kásipqoı boksshylar olar keminde 15 aıqas ótkizgen jaǵdaıda, Olımpıadalyq oıyndarǵa qatysýǵa quqyǵy bolǵan.
Búgin engizilgen túzetýler jasynan, tájirıbesinen, aıqas sanynan tys kez kelgen kásibı boksshyǵa Olımpıadaǵa qatysýǵa múmkindik beredi.
Uıym basshysynyń aıtýynsha, AIBA «ulttyq federatsııalar shekteýdi alyp tastaýǵa daýys berýin» qoldaıdy, óıtkeni «bul AIBA-ǵa tutastaı bokstyń barlyq túrin (áýesqoı ǵana emes, kásipqoı da) basqarýǵa yqpal etedi.
Budan buryn AIBA prezıdenti Chıng-Kýo Vý atap ótkendeı, sporttyń ár túrinde - onyń ishinde tennıs, basketbol, fýtbol, jáne t.b. - kásipqoı sportshylar Olımpıada oıyndaryna qatysa alady. Doktor Vý Olympic Agenda-2020 olımpıadalyq qozǵalysty reformalaý baǵdarlamasyna súıendi, onda Olımpıadaǵa eń úzdik sportshylar qaysýy qajet delingen.
Kásipqoı boksshylardyń Rıo-de-Janeıroda ótetin jarysqa qatysýy úshin AIBA Venesýelada 4-9 shildede taǵy bir APB/WSB irikteý týrnırin uıymdastyryp, ótkizýdi josparlaıdy. Onda 2016 jylǵy Olımpıadaǵa 26 joldama oınalady.
