Kásipqoı boksshy Sháripbaevtyń AQSh-taǵy jekpe-jeginiń kúni belgili boldy
ASTANA. QazAqparat - Qazaqstandyq kásipqoı boksshy Aıdar Sháripbaevtiń kelesi jekpe-jegi 17 naýryz kúni AQSh-tyń Maıamı qalasynda ótetin boldy, dep habarlaıdy QazAqparat tilshisi.
Ázirge jerlesimizdiń kimmen judyryqtasatyny belgisiz. Ol búgingi tańda Maıamı qalasyndaǵy Moro's Gym daıyndyq ortalyǵynda jattyǵý jumystaryn jasap, qarsylasyn kútýde.
Aıdar Sháripbaev kásipqoı bokstaǵy mansabyn 2014 jyly bastaǵan bolatyn. Búgingi kúnge deıin barlyǵy tórt kezdesý ótkizip, onyń úsheýin ýaqytynan buryn aıaqtady. Sońǵy jekpe-jegin 29 qazan kúni Almaty tórinde meksıkalyq boksshy Hýan Okýraǵa (13-9-1, 6 KO) qarsy ótkizdi.
Maıamıdegi jekpe-jek qazaqstandyq boksshynyń AQSh-taǵy alǵashqy kezdesýi bolmaq. Osyǵan deıin Sháripbaev bir aıqasyn Domınıkan elinde jáne úsheýin Almaty men Astana qalalarynda ótkizgen bolatyn.
