Kásipqoı boksshy Madııar Áshkeev kelesi aıqasyn vakantty tıtýl úshin ótkizetin boldy

NUR-SULTAN. QazAqparat - Qazaqstandyq kásipqoı boksshy Madııar Áshkeev (11-0, 6KO) 23 mamyrda ótetin AQSh-taǵy aıqasyn vakantty tıtýl úshin ótkizetin boldy, dep habarlaıdy QazAqparat tilshisi.

«BoxRec.com aqparatyna sáıkes, atalmysh aıqasta birinshi orta salmaqtaǵy NABF chempıonynyń vakantty tıtýly tigiledi. Aıqas 10 raýndqa eseptelgen. Qazaqstan ýaqyty boıynsha jekpe-jek 24 mamyr kúni tańerteń ótedi», - delingen «Qazaqstan kásipqoı boksshynyń» jelidegi paraqshasynda.

Eske sala ketsek, Madııar Áshkeevtiń (11-0, 6KO) kelesi jekpe-jegin 23 mamyr kúni AQSh-tyń Týson qalasynda (Arızona shtaty) ótkizetini buǵan deıin habarlanǵan bolatyn. BoxRec.com saıtynyń aqparatynsha, onyń qarsylasy 34 jastaǵy amerıkalyq Sesıl Makkalla (21-3, 8KO).

30 jastaǵy Áshkeev sońǵy ret rıngke bıylǵy 11 qańtarda shyqqan bolatyn. Santa Ineste (AQSh, Kalıfornııa shtaty) ótken kezdesýde qazaqstandyq sportshy tóreshilerdiń biraýyzdy sheshimimen Pýerto-Rıko ókili Lýıs Ernandesti (16-8, 9KO) jeńgen edi.