Kásipqoı boksshy Batyr Júkembaev qashan judyryqtasatynyn aıtty
ASTANA. QazAqparat - Qazaqstandyq kásipqoı boksshy Batyr Júkembaev (8-0, 7-KO) óziniń kelesi jekpe-jegin qashan ótkizetinin aıtty, dep habarlaıdy QazAqparat tilshisi.
Kezekti aıqas sáýir aıyna belgilendi. Biraq onyń naqty kúni men Júkembaevtiń qarsylasynyń esimi ázirge qupııada. Bul týraly boksshynyń «VKontakte» áleýmettik jelisindegi resmı paraqshasynda habarlandy.
«Komandamyzben aqyldasa kele 11 naýryzda Leme-Stıvens anderkartynda jekpe-jek ótkizbeıtin boldyq. Alla qalasa sáýir aıynda sharshy alańǵa oralyp, jankúıerlerime óte tartysty jekpe-jek syılaý maqsatynda jumys istep jatyrmyz. Bul jolǵy kezdesýim erekshe bolmaq. TOP-50 boksshynyń biri qarsylasym atanyp qalýy múmkin. Ázirge kelissózder júrip jatyr. Jaqyn kúnderi jekpe-jek ýaqyty men qarsylasymnyń esimi belgili bolady», - deıdi Batyr Júkembaev.
Buǵan deıin menedjer Anna Reva habarlaǵandaı, Batyr Júkembaev nemese Abylaıhan Hýsaınov 11naýryz kúni AQSh-ta ótetin Davıd Leme men Kertıs Stıvens jekpe-jeginiń anderkartynda shyǵýy kerek bolatyn.
Aıta keteıik, Batyr Júkembaev sońǵy kezdesýin 29 qańtarda ótkizip, meksıkalyq qarsylasy Davıd Ranheldi birinshi raýndta-aq nokaýtqa jibergen bolatyn.
