Kásipqoı boksshy Áshkeev kelesi aıqasyn AQSh-ta ótkizedi

NUR-SULTAN. QazAqparat - Qazaqstandyq kásipqoı boksshy Madııar Áshkeev (11-0, 6KO) kelesi jekpe-jegin 23 mamyr kúni AQSh-tyń Týson qalasynda (Arızona shtaty) ótkizedi. Bul týraly VKontakte áleýmettik jelisindegi «Qazaqstannyń kásipqoı boksy» paraqshasynda habarlandy.

BoxRec.com saıtynyń aqparatynsha, onyń qarsylasy 34 jastaǵy amerıkalyq Sesıl Makkalla (21-3, 8KO). Birinshi orta salmaqtaǵy aıqas on raýndqa eseptelgen. Boks keshi Qazaqstan ýaqyty boıynsha 24 mamyr kúni tańerteń bastalady.

30 jastaǵy Áshkeev sońǵy ret rıngke bıylǵy 11 qańtarda shyqqan bolatyn. Santa Ineste (AQSh, Kalıfornııa shtaty) ótken kezdesýde qazaqstandyq sportshy tóreshilerdiń biraýyzdy sheshimimen Pýerto-Rıko ókili Lýıs Ernandesti (16-8, 9KO) jeńdi.

Aıta keteıik, Áshkeevtiń kásipqoı rıngtegi isterin tanymal menedjer Egıs Klımas júrgizedi. Jýyq ýaqyttan bergi bapkeri - tájirıbeli tálimger Djeıms «Baddı» Makgırt.

Buǵan deıin taǵy bir kásipqoı boksshymyz - 24 jastaǵy Nurtas Ájbenovtiń (4-0, 1KO) kelesi qarsylasy anyqtalǵanyn habarlaǵan bolatynbyz. Anglııanyń Nıýkasl qalasynda ornalasqan Eagles Community arenasynda 3 mamyr kúni ótetin aıqasty Ájbenov 20 jastaǵy reseılik Borıs Shıkýnovpen ótkizedi. Jartylaı orta salmaqtaǵy jekpe-jek alty raýndqa eseptelgen.