Kásipqoı boksqa kelgen ánshi Ibragım Eskendir kezekti aıqasyn ótkizedi

MÁSKEÝ. QazAqparat - Reseı astanasy Máskeý qalasynda ótetin boks keshi qarsańynda qazaqstandyq sportshylar salmaq ólsheý rásiminen ótti, dep habarlaıdy QazAqparat VKontakte áleýmettik jelisindegi «Qazaqstannyń kásipqoı boksy» paraqshasyna silteme jasap.

Atap aıtqanda, almatylyq Edil Qojamberdıev Kamerýn ókili Krıstıan Salmankpen aıqasady. Boksshylar birinshi aýyr salmaq lımıtiniń (90,7 keli) sheginen asqan joq.

Bolashaǵynan úmit kúttiretin mańǵystaýlyq Ýálıhan «Adaı» Bısenqulov (4-0, 4 KO) 27 jastaǵy frantsýzdyq Mekongo Rodrıgespen kezdesedi. Qos sportshynyń da salmaǵy birinshi aýyr sanatqa (90,7 keli) saı boldy.

Belgili ánshi Ibragım Eskendir (2-0, 2 KO) men onyń qarsylasy - reseılik Dmıtrıı Antıpov tarazyda ekinshi orta salmaq sanatyna qajetti - 76,2 kelini kórsetti.

Úsh boksshynyń barlyǵy Jalǵas Túkeshov basqaratyn Tukeshov Boxing Promotions kompanııasynyń atynan shyǵýda.

Buǵan deıin habarlaǵanymyzdaı, otandastarymyz 17 maýsymda «Lokomotıv» boks akademııasynda (Máskeý, Reseı) sharshy alańǵa shyǵady.