Kásipqoı boks: Jan Kosobýtskııdiń qarsylasy jekpe-jekten bas tartty

NUR-SULTAN. QazAqparat - Qazaqstandyq nokaýter Jan Kosobýtskııdiń qarsylasy 24 sáýir kúni Belarýs astanasy Mınskide ótýi tıis bolǵan aıqastan bas tartty. Bul týraly VKontakte áleýmettik jelisindegi «Qazaqstan kásipqoı boksy» paraqshasynda jazyldy, dep habarlaıdy QazAqparat.

Jan Kosobýtskııdiń (9-0, 8KO) qarsylasy Qazaqstannyń týmasy, 38 jastaǵy Evgenıı Býhmıýller (15-4, 12KO) bolýy kerek edi. Boksshy Germanııa atynan shyǵýy tıis bolǵan. Málim etilgendeı, germanııalyq boksshy jaraqat alyp qalǵan.

«Keshe habarlasyp kezdesýden bas tartty. Jaraqatyn alǵa tartty. Qazir basqa qarsylas izdep jatyrmyz», - deıdi Kosobýtskıı.

30 jastaǵy qazaqstandyq boksshy erteń Mınskige ushatynyn habarlady. Laıyqty qarsylaspen sharshy alańda kezdesýge úmiti zor.

Aıta ketsek, kásipqoı boksta Jan Kosobýtskıı 2017 jyldyń qyrkúıek aıynan óner kórsetip keledi. Osyǵan deıin ótkizgen 9 jekpe-jektiń 8-in ýaqytynan buryn aıaqtaǵan.

Qazaqstandyq boksshy 24 sáýir kúni Belarýsta kezekti aıqasyn ótkizetini budan buryn habarlanǵan bolatyn. Mınsk Kosobýtskıı úshin sátti shahar dese de bolady. Belarýs astanasynda boksshy Aleksandr Nehaıchıkti jeńgen edi.