Kásipqoı boks: Nurtas Ájbenovtyń kelesi qarsylasy anyqtaldy

NUR-SULTAN. QazAqparat - 24 jastaǵy qazaqstandyq boksshy Nurtas Ájbenov (4-0, 1KO) kelesi aıqasyn 3 mamyr kúni Anglııanyń Nıýkasl qalasynda ornalasqan Eagles Community arenasynda ótkizetin boldy, dep habarlaıdy QazAqparat tilshisi.

Qazaqstan kásipqoı boks federatsııasynyń VKontakte paraqshasynda jarııalanǵandaı, qazaqstandyqtyń qarsylasy - 20 jastaǵy reseılik Borıs Shıkýnov. Jartylaı orta salmaqtaǵy jekpe-jek alty raýndqa eseptelip otyr.

«26 sáýir kúni Ájbenov Londonda Chehııanyń atynan shyǵyp júrgen armıan jigiti Hamo Aperıanmen (2-1, 2KO) aıqasqa shyǵýy kerek bolatyn. Alaıda bul kezdesý sońǵy sátte keıingi ysyryldy», - delingen habarlamada.

Nurtas Ájbenovtyń múddesin Qazaqstan boksshylarymen belsendi túrde jumys júrgizip jatqan MTK Global kompanııasy qorǵaıdy.

Eske sala ketsek, Nurtas Ájbenov tórtinshi jekpe-jegin Ýelstiń Kardıff qalasynda ótkizgen edi. Alty raýndtyq jekpe-jekte onyń qarsylasy 25 jastaǵy brıtandyq boksshy Krıs Adaveı (8-50-4, 1 KO) boldy. Kezdesý upaı sany boıynsha Ájbenovtiń aıqyn basymdyǵymen aıaqtaldy. Esep - 60-53. Ekinshi raýndta ol qarsylasyn nokdaýnǵa jibergen edi.