Kásipqoı boks: Meıirim Nursultanovtyń qarsylasy anyqtaldy

ASTANA. QazAqparat - Qazaqstandyq boksshy Meıirim Nursultanovtyń kásipqoı bokstaǵy kelesi qarsylasy anyqtaldy, dep habarlaıdy QazAqparat Qazaqstan boks federatsııasynyń baspasóz qyzmetine silteme jasap.

Áli birde-bir márte jeńilip kórmegen boksshy 24 naýryz kúni AQSh-tyń Kalıfornııa shtatynda ornalasqan Gollıvýdtaǵy Hollywood Fight Night shoýynda aıqas ótkizedi. Onyń qarsylasy - 32 jastaǵy pýertorıkalyq Lýıs Ernandes. Kezdesý segiz raýndqa josparlanyp otyr.

Meıirim úshin bul jolǵy aıqas - on birinshi kezdesý. Buǵan deıingi 10 kezdesýiniń bárinde de Meıirim Nursultanov jeńiske jetip, onyń segizin ýaqytynan buryn aıaqtaǵan bolatyn. Onyń qarsylasy 23 kezdesý artyq ótkizip, jeti márte jeńilgen. 16-da jeńiske jetken. Toǵyzynda Ernandes qarsylastaryn nokaýtqa jibergen.

Atalmysh boks keshinde qazaqstandyq Álı Ahmetov te (13-0, 10KO) óner kórsetedi. Otandasymyz ekinshi ortasha salmaqta jergilikti boksshy Maık Gaımen (9-3-1, 5KO) qolǵap túıistiredi.

Eske sala ketsek, osy jyldyń qańtar aıynda Meıirim Nursultanov meksıkalyq Ramon Agınagıdi ekinshi raýndta nokaýtqa túsirgen bolatyn.