Kásipqoı boks federatsııasy Sháripovanyń josparyna pikir bildirdi
«Eva Valstremmen jekpe-jek jaqsy múmkindik. Negizgi tıtýldardy jınaý qajet. Tıtýldardy qorǵaǵan jaqsy, biraq jańa beldikterdi de ıelený kerek. Fırýzanyń ekpini qarqyndy, oǵan qýana sáttilik tileımiz», - deıdi Demıanenko.
Ol sondaı-aq boks jáne MMA ókilderiniń arasynda aıqas uıymdastyrýǵa ne túrtki bolyp otyrǵany týraly pikirin bólisti.
«Meıvezer durys istep jatyr, óıtkeni ol kóbirek tabysqa kenelgisi keledi. Biraq mundaǵy tarazy basy teń emes. Aralas jekpe-jekte sportshylar kóbinese kúres, qylqyndyrý sııaqty ádisterge arqa súıeıdi. Meıvezer Nýrmagomedovpen jáne MakGregormen kezdesý týraly aıtqan Golovkın sekildi oktagonǵa kirip kórsinshi. Bul máselede men birshama konservatıvshilmin. Menińshe, mundaı aralas kezdesýlerdiń saldarynan bokstyń qyzyǵy qalyp barady. Bir jaǵynan, jurt ta osyǵan qyzyǵyp otyr», - deıdi Vıktor Demıanenko.
Bul rette, Kásipqoı boks federatsııasynyń vıtse-prezıdenti Fırýza Sháripovanyń Krıs Saıborg - Amanda Nýnes jekpe-jeginiń jeńimpazymen kezdesý týraly bastamasyn quptamady.
«Eń aldymen, bokstaǵy barlyq tıtýldardy jınap alýdy basty maqsat etip, soǵan kúsh jumsaý qajet. Óz basym jankúıer retinde Fırýzanyń ataǵy jaıylǵanyn, damyǵanyn qalaımyn. Al UFC chempıondarynyń boksta Fırýzaǵa kórseter qaýqary joq», - deıdi Demıanenko.
Eske sala keteıik, Fırýza Sháripova 22 jeltoqsan kúni Sankt-Peterbýrgtegi «SIBÝR ARENA» kontserttik-sport kesheninde WBC tujyrymy boıynsha álem chempıony, fınlıandııalyq Eva Valstremmen kezdesedi.
Jekpe-jekke Valstremnyń WBC belbeýi jáne qazaqstandyq sportshynyń IBO Championship belbeýi tigilgen. Osy aıqastyń jeńimpazy jartylaı orta salmaq sanatyndaǵy álemdegi úzdik boksshy atanady.