Kásipqoı boks: Edil Qojamberdıev IBA Asia tıtýlyn jeńip aldy

ALMATY. QazAqparat –Qazaqstandyq boksshy Edil Qojamberdıev (8-2,8KO) qarsylasyn jeńip, IBA tujyrymy boıynsha Azııa chempıony atandy, dep habarlaıdy QazAqparat tilshisi.

Almaty qalasynda ótken «Jetisý jaýyngerleri» kásipqoı boks keshinde Qojamberdıev ázerbaıjandyq qarsylasy Kazım Ýmýtovty (3-1, 1KO) 3-raýndta nokdaýnǵa túsirgennen keıin, tóreshi jekpe-jekti toqtatýǵa sheshim qabyldady.

Osylaısha, 8 raýndqa josparlanǵan jekpe-jekte otandasymyz birinshi aýyr salmaqta IBA Asia tıtýlyn jeńip aldy.

Aıta keteıik, búgin Almaty qalasynda MTK Qazaqstan promoýterlik kompanııasynyń uıymdastyrýymen «Jetisý jaýyngerleri» kásipqoı boks keshi ótti. Sharshy alańda 9 jup óner kórsetip, 8 qazaqstandyq jáne bir ózbekstandyq boksshy jeńiske jetti.