Kásipqoı boks: Dychko qarsylasymen kóz arbasty
ASTANA. QazAqparat - Kásipqoı boksqa aýysqan 27 jastaǵy qazaqstandyq boksshy Ivan Dychko qarsylasymen kóz arbasty, dep habarlaıdy QazAqparat.
Buǵan deıin habarlaǵanymyzdaı, otandasymyz kásipqoı bokstaǵy alǵashqy jekpe-jegin 29 qyrkúıekte AQSh-tyń Dallas qalasynda 34 jastaǵy amerıkalyq Eıbýr Raıtqa(2-1, 1KO) qarsy ótkizedi.
«Erteń biz saparymyzdy bastaımyz. Ivan Dychkonyń debıýttyq kezdesýin keshki saǵat 9-da TV Bein Sports kanalynan tamashalaı alasyzdar. Nazar aýdaryńyzdar, bul jas jigit birneshe jyldan keıin aýyr salmaqtyń úzdigi atanady», - dep jazdy Dychkonyń komandasy DSBoxing.
Aıta keteıik, eki márte olımpıadanyń qola medalin alǵannan keıin, Dychko 2017 jylǵy maýsymda amerıkalyq The Heavyweight Factory promoýterlik kompanııasymen kelisimshartqa otyrdy. Boksshyny bul kúnde Sergeı Kovalevtiń burynǵy bapkeri Derek Santos jattyqtyryp jatyr.
