Kásipqoı boks: Bobyrjan Momynovtyń qarsylasy ózgerdi

NUR-SULTAN. QazAqparat – Osy ýaqytqa deıin sharshy alańda jeńilip kórmegen Qazaqstan boksshysy Bobyrjan Momynov (12-0, 8KO) kelesi jekpe-jegine qatysty josparyn ózgertti, dep habarlaıdy QazAqparat tilshisi.

Buǵan deıin BoxRec.com saıty 27 naýryz kúni Reseıdiń Ekaterınbýrg qalasynda Bobyrjan Momynov jartylaı orta salmaqta bos turǵan IBF Baltic chempıondyq ataǵy úshin ýkraınalyq Eýard Skavınskıımen (13-0, 7KO) judyryqtasatyndyǵyn jarııa etken bolatyn. Degenmen, VKontakte áleýmettik jelisindegi «Qazaqstannyń kásipqoı boksy» paraqshasyndaǵy aqparatqa sáıkes, otandasymyz 25 naýryz kúni Pýerto-Rıkoda ótetin Ring City kezekti shoýynda sharshy alańǵa oralmaq.

«Dostar! Allanyń qalaýymen sharshy alańǵa 25 naýryzda Pýerto-Rıkoda sharshy alańǵa oralatyndyǵymdy habarlaǵym keledi. Sizderdi kezekti ret jeńisimmen qýantý úshin barlyq múmkindikti jasaımyn», - dep jazdy otandasymyz Instagram-paraqshasynda.

Onyń bul jolǵy qarsylasy amerıkalyq Braıan Sebalo (12-0, 6KO).

Sebalo – Qazaqstannyń boks jankúıerleri úshin tanys esim. Ol 2019 jyly sharshy alańda otandasymyz Baqtııar Aıýbaevpen (14-2-1, 12KO) kezdesip, tóreshiler sheshimimen jeńiske jetken bolatyn.

Al Momynov sońǵy jekpe-jegin 2020 jyldyń 27 qyrkúıeginde Qazan qalasynda ótkizip, tóreshilerdiń basym daýysymen reseılik Vagınak Tamrazıandy jeńip, jartylaı orta salmaqta IBF Eurasia chempıondyq ataǵyn jeńip alǵan edi.