Kásipqoı boks: Aıdos Erbosynuly qarsylasyn utyp, ataqtaryn qorǵap qaldy

NUR-SULTAN. QazAqparat – Mınskide (Belarýs) qazaqstandyq Suleimen Promotions promoýter kompanııasy uıymdastyrǵan boks keshi márege jetti, dep habarlaıdy QazAqparat tilshisi.

Sońǵy jekpe-jekte ekinshi orta salmaqta qazaqstandyq, ekinshi dárejeli WBO Global, WBC Asia jáne WBA International tıtýldarynyń ıegeri Aıdos Erbosynuly (13-0) men germanııalyq, túbi nıgerııalyq Nýhý Laval (27-6) rıngke shyqty.

Aıqas barysynda boıy men qolynyń uzyndyǵyn paıdalanǵan Aıdos qarsylasyn eki márte nokdaýnǵa jiberdi.

Budan keıin de A.Erbosynuly saýatty bokstasyp, sheberligi basym ekendigin kórsete bildi. On raýndqa sozylǵan báseke merziminen buryn aıaqtalmaǵanymen, jeńis tóreshilerdiń biraýyzdan sheshimimen Aıdostyń enshisinde ketti.

Osylaısha Aıdos Erbosynuly 14-inshi jeńisine qol jetkizip, óz ataqtaryn qorǵap qaldy.

Bul boks keshinde kútpegen jaǵdaı da boldy. Jartylaı orta salmaqta qazaqstandyq, ekinshi dárejeli WBA Inter-Continental, WBO Oriental jáne IBF Australasian tıtýldarynyń ıegeri Nursultan Jańabaev on raýndqa eseptelgen básekede frantsııalyq Sendı Messaýdpen judyryqtasty. Ekinshi raýndta Nursultan nokdaýnǵa túsip qalsa, jetinshi kezeńde qabaǵy jarylǵandyqtan, referı kezdesýdi toqtatty. Jeńis tóreshilerdiń sheshimimen S.Messaýdqa berildi.

Sóıtip N.Jańabaev barlyq ataqtarynan aıyrylyp qaldy.

Al 2019 jylǵy Azııa chempıony Bek Nurmaǵanbet kásipqoı bokstaǵy qadamyn sátti bastady. Ol majarstandyq Tamash Laskýdi (19-22-1) birinshi raýndta-aq nokaýtqa jiberdi. Taǵy bir qazaqstandyq Evgenıı Pavlov kásipqoı bokstaǵy alǵashqy jekpe-jegin jeńispen bastady. Ol da majarstandyq Patrık Horvatpen rıngke shyǵyp, ekinshi raýndta qarsylasyn tórt ret nokdaýnǵa túsirdi.

Eske sala keteıik, budan buryn qazaqstandyq boksshynyń salmaǵy áldeqaıda aýyr qarsylasyn tehnıkalyq nokaýtpen jeńgenin jazǵan bolatynbyz.