Kásipqoı boks álemi birqatar qazaq ulandarymen tolyqty
ASTANA. QazAqparat - Búgingi álemdik arenada kásipqoı bokstan el abyroıyn asqaqtatyp júrgen qarakóz sportshylarymyz saýsaqpen sanarlyq. Endi sol sportshylardyń ortasy taǵy birqatar qazaq ulandarymen tolyqty. Solardyń biri - asa aýyr salmaqtaǵy Rýslan Myrsataev.
Myrsataev boks jankúıerlerine jaqsy tanys. Ol 1985 jyly mamyrdyń 7-si kúni Qyrǵyzstanda dúnıege kelip, 2005 jyly ata-jurtyna qonys aýdarǵan qandastarymyzdyń biri.
Rýslan eń áýeli sporttyq mansabyn balalyq shaǵynda fýtbol oınaýdan bastaıdy. Keıin sambo kúresine qyzyǵyp, eki jyldaı bozkilem kórigin qyzdyrady. Biraq, sporttyń bul túrinen jaqsy nátıje kórsete almaıtynyn bilip, 17 jasynda Keńes odaǵyna áıgili bolǵan bapker Vladımır Roslovtyń qol astynda jattyǵyp, boks álemine bilek sybana kirisedi.
Ol Qyrǵyzstanda júrgende 2005 jyly sol eldiń atynan Azııa birinshiligine qatysyp, jaqsy óner kórsetti. Sol jyly álem chempıonatynda da shırek fınalǵa deıin jetip, bolashaǵynan úmit kúttirgen sportshylardyń biri atandy. Sodan qazirge deıin bylǵary qolǵabyn sheshken emes.
Al Myrsataev ata-jurtyna oralǵan soń da, kóptegen iri jarystarǵa qatysyp, abyroıymyzdy bıikterden kórsete bildi. Osyǵan deıin ár túrli saıystarda +91 keli salmaq dárejesinde Qazaqstan namysyn qorǵap keldi. Qazaqstan ulttyq quramasynda óner kórsetip, Beıjiń Olımpıadasyna qatysyp, shırek fınalǵa deıin jetken bolatyn.
Ol 2009 jyly Prezıdent kýbogynda kúmis júldeger atansa, 2010 jyly ótken básekede qola júldeni jeńip aldy. Sondaı-aq osy jyly kúzde Astanada WSB jobasy aıasynda qurylǵan «Astana arlandary» quramasynyń beldi sportshylarynyń biri bolyp, qatarynan bes jyl osy quramada tapjylmaı óner kórsetti. Sonyń nátıjesinde AIBA tarapynan 2012 jylǵy WSB dárejesi boıynsha «jyldyń úzdik boksshysy» dep tanyldy.
Endi Rýslan ónerin kásipqoı boksta jalǵastyrmaq. Ol kásipqoı rıngtegi alǵashqy jekpe-jegin ózge boksshylar sııaqty qurlyq asyp, shetelderde ótkizýdi jón sanamapty. Myrsataev tuńǵysh aıqasyn birden Alataý bókterindegi ásem Almaty qalasynda 30 qańtar kúni jergilikti jankúıerlerge tartý etpek.
Boks keshi jergilikti ýaqytpen keshki saǵat 20:00-de Royal Tulip qonaq úıinde ótedi.
Bul kúni Myrsataevtan ózge birqatar qazaq ulandary kásipqoı bokstaǵy reıtıngtik aıqastaryn ótkizedi. Olar: Aıdos Erbosynuly, Berikbaı Nurymbetov, Erjan Zalılov, Nursultan Qabdýlov. Qazirge bul baýyrlarymyzdyń qarsylastarynyń esimderi jarııalana qoıǵan joq. Al Rýslan Myrsataevtyń alǵashqy qarsylasy - reseılik boksshy Valerıı Zamıralov.
Valerıı osyǵan deıin kásipqoı boksta úsh jekpe-jek ótkizip, úsheýinde de jeńilistiń kermek dámin tatypty. Rýslan men Valerıı arasyndaǵy jekpe-jek osy boks keshiniń basty aıqasy bolmaq.
Boks jekpe-jekterin «BM Global» jáne «Diamond Ring» JShS jáne Qazaqstan kásipqoı boks federatsııasy uıymdastyryp otyr.
Kásipqoı boks álemine qadam basqan baýyrlarymyzǵa sáttilik joldas bolsyn dep tileıik.
Kúnsultan Otarbaı
