«Kásipqor» jelisine birqatar bilim ordasy kiredi
ASTANA. 7 jeltoqsan. QazAqparat - «Kásipqor» jelisine Astana, Almaty, Aqtóbe jáne Shymkent qalalaryndaǵy álemdik deńgeıdegi 4 jańa kolledj, Atyraý, Ekibastuz,
Óskemen jáne Shymkent qalalarynda ornalasatyn 4 óńiraralyq ortalyq jáne memlekettik tehnıkalyq-kásiptik bilim berý uıymdar sanatynan 9 áriptestik kolledj kiretin bolady, dep habarlady pm.kz saıty.
«Kásipqor» uzaq merzimdi strategııasy oqý oryndaryn bilim alýdyń qos júıeli baǵdarlamasyna aýystyrýǵa negizdelgen. Bastapqy kezeńde «Kásipqor» holdınginiń kollejderinde bilim berý úrdisi kelesideı keste boıynsha qurylatyn bolady: oqýdyń 80 paıyzy bilim berý ornynda, al 20 paıyzy óndiriste ótedi.
Oqý oryndarynda óndiristik tsıklge elikteý qalyptastyrylyp, stýdentterdi óndiristik tájirıbeden ótkizý úshin kásiporyndarmen kelisimsharttar jasalady. Іlki rejimde 1-2 mamandyq boıynsha qos júıede bilim berý baǵdarlamalary ázirlenedi.
«Kásipqordyń» jańa kolledjderinde 7 mektep, atap aıtqanda ınjınırıng mektebi, sáýlet jáne qurylys mektebi, aqparattyq jáne kommýnıkatsııalyq tehnologııalar mektebi, dızaın jáne jobalaý mektebi, agroónerkásiptik keshen mektebi, metallýrgııa jáne mashına jasaý mektebi, pánaralyq mektep (kásiptik mektep) jumys isteıtin bolady. Árbir kolledjde ınnovatsııa jáne damý ortalyǵy ashylady.
«Kásipqordyń» jańa kolledjderin mamandandyrý jalpy ishki ónimniń 40 paıyzdan astamyn quraıtyn ekonomıka sektorlarynyń suranysyn tikeleı qanaǵattandyratynyn atap ótý kerek.
