«Kásipqor holdıngi» ındýstrııalandyrýdyń ekinshi kezeńine maman daıarlaýǵa járdemdesedi
ASTANA. QazAqparat - «Kásipqor holdıngi» ındýstrııalandyrý baǵdarlamasynyń ekinshi besjyldyǵyna maman daıarlaýǵa járdemdesedi. Búgin Májiliste Áleýmettik-mádenı damý komıtetiniń keńeıtilgen otyrysynda «Kásipqor holdıngi» kommertsııalyq emes aktsıonerlik qoǵamynyń basqarma tóraıymy Eldana Sádýaqasova osylaı málim etti. Jıyn barysynda «Kásipqor Holdıngi» AQ qyzmeti talqylanǵan bolatyn.
«Kásiptik bilim berý salasynda biz ásirese óndiristik, tájirıbelik daıarlyqqa barynsha mán beremiz. Bul rette dýaldyq bilim berýdiń quramdasy retinde praktıkalyq daıarlyqta oqýdyń eki deńgeıli júıesi engiziledi. Birinshi deńgeıde stýdent teorııalyq bilimge qanyǵady, bul úshin kolledjder zamanaýı oqý-óndiristik jabdyqtarmen qamtylady. Sonymen bir mezgilde stýdentter óndiriske jiberýge ruqsat etetin júıe boıynsha qosymsha úlgilerdi oqıdy. Osylaısha, óndiriske ruqsat alǵan stýdent oqýdyń ekinshi deńgeıine ótedi ári tikeleı kásiporynda jumys tájirıbesine aralasady», - deıdi Eldana Sádýaqasova.
Onyń aıtýynsha, óndiristik tájirıbede kolledj stýdenti tálimgerdiń kómegimen naqty óndiris nysanynda tolyqtaı jumys normasymen qamtylady. Osylaısha, jumys berýshiler men túlekter arasyndaǵy talap alshaqtyǵy joıylady. Al bitirýshilerge qazaqstandyq úlgidegi jáne sheteldik seriktesterdiń dıplomy men biliktilik sertıfıkattary beriledi.
«Holdıng ındýstrııalandyrý baǵdarlamasynyń ekinshi besjyldyǵyn júzege asyrýǵa mamandar daıarlaýǵa járdemdesetin bolady. Búgingi kúni óziniń áleýeti, mamandyqty baǵdarlaýy, materıaldyq-tehnıkalyq jaǵdaıy turǵysynan óńirlik damý jobasyna saı keletin 10 kolledj aıqyndaldy. Olar úshin kadr daıarlaý baǵytynda damýdyń jekeleı baǵdarlamasy ázirlenedi», - dedi E.Sádýaqasova.
Ol sondaı-aq bul baǵyttaǵy jumystardy qarjylandyrý respýblıkalyq bıýdjetten qaralatynyn jetkizdi.
