Kásipkerliktiń damýyna kedergi keltirip otyrǵan problemalardy joıyp jatyrmyz - Qulybaev

KÓKShETAÝ. QazAqparat - Qazaqstan Respýblıkasy «Atameken» ulttyq kásipkerler palatasy prezıdıýmynyń tóraǵasy Tımýr Qulybaev jumys saparymen Kókshetaý qalasynda bolyp, óńirde kásipkerlikti damytýdyń tıimdi baǵyttary jáne túıitkildi máselelerin sheshý joldaryn qarastyrǵan keńeıtilgen májilis ótkizdi, dep habarlaıdy QazAqparat tilshisi.

Óńirlik kásipkerler palatasynyń keńesinde  ótken jıynǵa aımaq basshysy Málik Myrzalın, oblystyq máslıhat depýtattary, óńirlik kásipkerler palatasy men «Damý» kásipkerlikti damytý qorynyń ókilderi, oblystyq departamentter, basqarmalar jáne túrli vedomstvo basshylary qatysty. Májiliste kásipkerler men memlekettik organdar arasynda túsinispeýshilikten týyndaıtyn daýly keıbir máseleler jáne memlekettik jekemenshik seriktestik, aýyl sharýashylyǵy kooperatıvterin qurý, shaǵyn jáne orta bıznesti damytý sóz boldy.

«Palata qurylǵan bes jyldyń ishinde bıznes qurylymdarymen baılanys durys jolǵa qoıyldy. Óńirlerdegi ulttyq palata ókilderi kásipkerliktiń damýyna kedergi keltirip otyrǵan kóptegen problemalardy anyqtap, sheshýge atsalysýda», - deı kele, Tımýr Qulybaev jergilikti bılik ókilderin kásipkerlikti damytý baǵytynda yntymaqtasa jumys isteýge shaqyrdy.

Prezıdıým tóraǵasynyń aıtýynsha, sońǵy bes jyldyń ishinde kásipkerlerden 22 myń ótinish tússe, onyń 40 paıyzy oń sheshimin tapqan. Kásipkerlerdiń quny 92 mıllıardtan astam teńge bolatyn múliktik quqyǵy qorǵaldy. Onyń ishinde, aıyppuldar, ósimaqy jáne múlikti saqtaý úshin tólenetin aqylar bar. Sonymen qatar ulttyq palatanyń qatysýymen jańa salyq kodeksi ázirlendi. Ásirese, memlekettik jekemenshik seriktestigi jáne «Bastaý» jobalarynyń júzege asyrylýyna yqpal etti.

Osy oraıda oblys ákimi Málik Myrzalın óńir kásipkerlerine barynsha qoldaý  kórsetilip, olardyń máselelerin talqylaý jáne sheshý joldaryn izdestirý baǵytynda aýqymdy jumys atqarylyp jatqanyn atap ótti. Bul týraly óńirlik kásipkerler palatasynyń basshysy Qaırat Sultanov óz baıandamasynda keńinen taratyp, aıtyp berdi. Onyń aıtýynsha, qazirgi kezde, oblysta kásipkerlik sýbektileriniń sany 42 myńdy quraıdy.  Sońǵy jyldary saýyqtyrý, ekologııa, ańshylyq, balyq aýlaý jáne taý-shańǵysy baǵyty boıynsha kásipkerlikti damytýǵa zor kóńil bólinip keledi. Ótken jyly óńirlik kásipkerler palatasy tarapynan jergilikti kásipkerlerden túsken 390 shaǵymnyń jartysy oń sheshimin tapty.

Sonymen qatar sapar aıasynda prezıdıýmynyń tóraǵasy Kókshetaý qalasyndaǵy «Asyl arman» jaýapkershiligi shekteýli seriktestiginde bolyp, irgeli óndiris ornynyń jumysymen tanysty.