Kásipkerliktiń damý qarqyny áli de bolsa báseń, óz áleýetine saı emes - Prezıdent

ASTANA. QazAqparat - Aqordada Memleket basshysy Qasym-Jomart Toqaevtyń otandyq bıznes ókilderimen kezdesti, dep habarlaıdy QazAqparat.

«Osyndaı alqaly jıyn ótkizý jaqsy dástúrge aınaldy. Sebebi, bıznes salasy – ulttyq ekonomıkanyń negizgi tireginiń biri. Memleket kásipkerlikti damytýǵa basa mán berip otyr.

Biz qazir Ádiletti Qazaqstannyń jańa ekonomıkalyq modelin qalyptastyrýǵa kiristik. Bul – barshamyzǵa ortaq jumys, eń aldymen, elimizdiń keleshegi úshin óte mańyzdy qadam. Osy jumysqa kásipkerlerimiz belsene atsalysýy qajet. Sondyqtan, biz búgin bıznes salasynda qordalanǵan máselelerdi talqylaımyz. Aldaǵy mindetterdi aıqyndap alýymyz kerek», - dedi Prezıdent.

Ol bıylǵy Joldaýynda elimizdi odan ári damytýǵa arnalǵan tyń tásilderdi usynǵanyn alǵa tartty.

«Biz ekonomıkanyń ósimin keminde 6-7 paıyzǵa jetkizýimiz kerek. Ol úshin bıznestiń jeke bastamalaryna barynsha qoldaý kórsetý qajet.

Osy baǵytta biraz sharýa atqaryldy. Degenmen, kásipkerliktiń damý qarqyny áli de bolsa báseń, óz áleýetine saı emes deýge bolady. Bir sózben aıtqanda, bizge shyn máninde sapaly serpilis qajet. Eń aldymen, memleket pen bıznestiń qarym-qatynasy múlde jańa úlgige kóshýge tıis», - dedi Toqaev.